Sumqayıt şəhər İcra Hakimiyyəti, YAP Sumqayıt şəhər təşkilatı və şəhər Ağsaqqallar Şurasının təşkilatçılığı ilə silsilə tədbirlər həyata keçirilir. Bu tədbirlərdə "Sumqayıt doğma evimizdir, onu daha da müasir şəhərə çevirmək hər birimizin borcudur” mövzusu ilə əlaqəli müzakirələr aparılır, qarşıya qoyulmuş məsələlərlə bağlı təklif və tövsiyələr səsləndirilir.
Xeberle.com-a verilən məlumata görə, növbəti belə tədbir Hacı Zeynalabdin qəsəbəsində keçirilib.
Çıxışlarda ölkəmizin hər yerində olduğu kimi, Sumqayıt şəhərinin də yeni inkişaf mərhələsini yaşadığı bildirilib.
Qeyd olunub ki, regionların sosial-iqtisadi inkişafına böyük diqqət yetirən dövlət başçısının hərtərəfli qayğısı sayəsində şəhərdə əsaslı və kompleks yenidənqurma işləri görülüb.
Bildirilib ki, Sumqayıtda yol-nəqliyyat infrastrukturunun müasirləşdirilməsi ilk növbədə əhalinin sosial şəraitinin yaxşılaşdırılması istiqamətində görülən əsaslı tədbirlərdəndir. Şəhərdaxili küçələrin, eləcə də məhəllədaxili yolların asfaltlanması işləri mərhələli şəkildə davam edir.
Vurğulanıb ki, şəhərin simasının günün tələbləri səviyyəsində qurulmasını təmin etmək məqsədilə kompleks tədbirlərin həyata keçirilməsi üçün şəhər icra hakimiyyətində xüsusi proqram hazırlanıb. Prezident İlham Əliyevin regionların sosial-iqtisadi inkişafına göstərdiyi diqqət və qayğının nəticəsi olaraq şəhərdə irihəcmli infrastruktur layihələr bundan sonra da davam etdiriləcək.
Tədbirdə ərazidə yaşayan təhsil işçiləri, səhiyyə, mədəniyyət, uşaq bağçaları kollektivinin nümayəndələri, Mənzil Komunal Sahələrinin əməkdaşları, sahibkarlar və ictimai fəallar iştirak ediblər.
Xəbərdən istifadə edərkən istinad etmək vacibdir.
