"Mən təxminən 18 il öncə burda olmuşam və sonuncu səfərimdən bu vaxta qədər çox böyük dəyişikliklər olub. Azərbaycan xeyli inkişaf edib. Açığı, ilk gəlişimdə bir qədər cansıxıcı idi, indi isə hər tərəf xeyli abadlaşıb, müasirləşib”.
Bu fikirləri saytımıza açıqlamasında 2000-ci ildə BP şirkətinin Ətraf Mühit üzrə qrup lideri kimi Azərbaycana gəlmiş və Xəzər dənizində tədqiqatlar aparmış, indi isə Qərbi Kaspi Universitetinin dəvəti ilə Bakıda olan şotlandiyalı tədqiqatçı Ronnie Gallagher bildirib.
Tədqiqatçı sürətli inkişafın gətirdiyi problemlərə də diqqət çəkib: "Düşünurəm ki, BP kimi kompaniyaların ölkəyə gətirdiyi sərvət, neft və qaz gəlirləri ölkənizi tanınmaz dərəcədə dəyişmişdir. Bununla yanaşı, qeyd etmək istərdim ki, yeniliklərlə bərabər problemlər də meydana çıxmışdır. Bunlar əsasən arxeologiya-maddi mədəniyyət abidələrinin qorunması ilə bağlı olan problemlərdir. Tarixi binalara ziyan dəyir. Çünki insanlar yeni evlər, yeni binalar tikirlər və düşünürəm ki, burada da qeyri-normal bir şey yoxdur. Bilirik ki, Azərbaycan dövləti öz maddi-mədəni irsini dəyərləndirir, onun əhəmiyyətini yüksək qiymətləndirir və anlayır ki, gələcəkdə hər hansı böyük layihələr həyata keçirilərkən bu kimi məsələlər daha yaxşı öyrənilib, təhlil olunmalı və tarixi binalar qorunmalıdır. Yenə də deyirəm ki, belə böyük  dəyişikləri görmək xoşdur və ölkəniz bu dəyişikliklərdən daha çox xeyir götürür, faydalanır”
 

Xəbərdən istifadə edərkən istinad etmək vacibdir.