"Ümumi ərazisi 10 min kvadratmetr olan Bayraq muzeyinin üçmərtəbəli binasında iki sərgi zalı, inzibati və yardımçı otaqlar yaradılıb.
Sərgi zallarında 6 bölmə fəaliyyət göstərir. Burada Azərbaycan xanlıqlar dövrünün xəritəsi, bayraqları, orta əsrlərə aid döyüşçüləri əks etdirən manikenlər nümayiş olunur. Muzeyin eksponatları arasında XIX əsr Azərbaycan şəhərlərinin gerbləri, qədim metal sikkələr, kağız pullar, Azərbaycan Xalq Cümhuriyyəti dövrünə aid sənədlər, keçmiş Azərbaycan SSR-in və müstəqil Azərbaycan Respublikasının konstitusiyaları, gerblər, bayraqlar var. Ekspozisiyalarda müxtəlif illərə aid poçt markaları, orden və medallar da nümayiş olunur". Bunu Xeberle.com-a muzey haqqında danışarkən Sumqayıt Şəhər Bulvar idarəsinin müdiri Yavər Vəliyev bildirib. İdarədən həmçinin bildirilib ki, bu məkanın son vaxtlar ziyarətçiləri çox olur. Şəhərə gələn bütün əcnəbi və yerli qonaqlar Şəhər İcra Hakimiyyətinin təşəbbüsü ilə muzeyi ziyarət edir, həmçinin də orta məktəb şagirdləri tez- tez muzeyə baş çəkirlər.
Qeyd edək ki, muzeyin rəhbərliyi vəzifəsinə hələ də təyinat olunmayıb. Bulvar idarəsindən bildirilib ki, təyinat gələn il üçün gözlənilir.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
