Xəbər verdiyimiz kimi, bu yaxınlarda Prezident İlham Əliyev "Azərbaycan Respublikasının şəhər və rayonlarında çoxmənzilli binaların dam örtüklərinin təmiri ilə bağlı əlavə tədbirlər haqqında” Sərəncam imzalayıb.

Sərəncama əsasən, Azərbaycan Respublikası Prezidentinin 2017-ci il 25 dekabr tarixli Fərmanının 1.14.3.3.9-cu (islahatlarla bağlı xərclər) yarımbəndində nəzərdə tutulan vəsaitin 21 milyon 194 min 760 manatı 436 çoxmənzilli binanın dam örtüyünün təmiri məqsədi ilə Azərbaycanın 27 şəhər və rayonunun icra hakimiyyətlərinə ayrılıb.
Vəsait ayrılan şəhərlər sırasında Sumqayıt da var.
Xeberle.com şəhərdə hansı ərazilərdəki yaşayış binalarının dam örtrüyünün dəyişdiriləcəyini araşdırıb.
Mənzil Kommunal İstehsalat Birliyinin baş mühəndisinin müavini Rövşən Fərəcov bildirib ki, ölkə başçısının son sərancamına əsasən Sumqayıtda 59 yaşayış binasının yaxın günlərdə dam örtüyünün dəyişdirilməsi işinə başlanılacaq: "Ümumilikdə Sumqayıt şəhərində mənzil fonduna aid 1363 yaşayış binası var ki, bunlardan da 850-si yumşaq tipli dam örtüyüdür. Bu səpkidə 2015-ci ilin sonlarından bu günədək artıq 550 yaşayış binasının yumşaq dam örtüyü dəyişdirilərək müasir tələblərə cavab verən metal keramit dam örtükləri ilə əvəz edilib. Son sərancamın icrası ilə əlaqədar 2, 3, 8 və 10-cu mikrarayonlarda, eləcə də 18, 19, 47 və 48-ci məhəllələrdə dam örtüyü yararsız vəziyyətdə olan binalarda işlərin aparılması nəzərdə tutulur".
Xatırladaq ki, Sumqayıtda 59 yaşayış binasının dam örtüyünün dəyişdirilməsinə 2 milyon 992 min manat ayrılıb.
Xədicə Səxavətqızı
Xeberle.com