Bu barədə Xeberle.com-a müraciət edən vətəndaş bunları bildirib: "Yanımda iki əlil uşaqla Sumqayıtda 7 saylı marşrut xətti ilə hərəkət edən avtobusa minmək istəyərkən sürücüdən fiziki qüsurlu şəxslər üçün nəzərdə tutulmuş pandusu açmasını xahiş etdim. Lakin sürücü pandusun açılmadığını iddia etdi. Sözün açığı, özüm də buna cəhd etsəm də, pandusu aça bilmədim. Sonda məcbur qalıb çətinliklə də olsa, avtobusdakı digər sərnişinlərində köməkliyi ilə əlil arabasında olan usağı avtobusa qaldırdıq, sürücünün köməkçisi isə bizə kömək etmək əvəzinə, aqressiv halda bizə tez- tez cəld olun əmrini verirdi”.

Qeyd olunan şikayətlə əlaqəli olaraq Sumqayıt Avtomobil Nəqliyyatı ilə Sərnişindaşıma İdarəsinin rəisi Tofiq Saydumovla əlaqə saxladıq. İdarə rəisi Xeberle.com-a bildirdi ki, belə hallar heç vaxt olmayıb, ola da bilməz: "Əgər hansısa sürücüdən, yaxud nəqliyyat vasitəsindən şikayətiniz varsa, həmin nəqliyyat vasitəsinin dövlət qeydiyyat nömrə nişanını və qayda pozarkən şəklini çəkib bizə göstərin. Biz də lazimi tədbirləri görək və həmin sürücünü cəzalandıraq.”

Digər müraciətdə isə bildirilirdi ki, işıqforun yaşıl işığında piyadalar üçün nəzərdə tutulmuş zolaqdan yolu keçmək istəyərkən 5 saylı marşrut xətti ilə hərəkət edən avtobus yaşıl işıqda piyadalara yol vermədi.”

Bu müraciətə də qurum rəsmisi belə cavab verdi ki, həmin nəqliyyat vasitəsi qaydanı pozarkən şəklini çəkərdiniz və qeydiyyat nömrə nişanını götürərdiniz.

Bu məqama bir münasibət bildirmək istərdik. Maraqlıdır, həmin anda insan öz canının hayında olarkən şəkil çəkmək, yaxud da nömrəsini qeyd etmək necə yada düşə bilər axı?! Belə hallar şəhərdə nəqliyyat tıxaclarının yaranmasına, yol-nəqliyyat hadisələrinin baş verməsinə, sərnişinlərin və piyadaların həyatının təhlükə altında olmasına gətirib çıxarır. Sonra da qəzaların sayının artmasının səbəblərini araşdırırlar...

Xədicə Səxavətqızı

Xeberle.com