Son dövrlər Azərbaycanda ətraf mühitin mühafizəsi ilə bağlı müəyyən işlər görülüb. Bildiyimiz kimi, Balaxanı qəsəbəsində məişət tullantılarının çeşidlənməsi üzrə zavod tikilmiş və hazırda istifadədir. Bu zavodda bərk məişət tullantılarının çeşidlənməsi xüsusi texnoloji proses həyata keçirməklə aparılır. Bərk məişət tullantılarının çeşidlənməsi onların əhəmiyyətli hissəsinin xammal kimi təkrar istifadəyə qaytarılmasına kömək edir. Dünyanın bir çox ölkəsində tullantıların çeşidlənməsi əhali tərəfindən aparılır və bu cür təşkilati işlər onların təkrar emala qaytarılmasını asanlaşdırır.
Azərbaycanda tullantıların çeşidlənməsində əhalinin rolu demək olar ki, çox azdır. Lakin, qeyd etdiyimiz kimi, dünyanın bütün inkişaf etmiş ölkələrində məişət tullantılarının çeşidlənməsi yerlərdən başlayır və təkrar emal vasitəsilə faydalı materiallara çevrilir. Ölkədə məişət tullantılarının çeşidlənməsi üçün müəyyən tədbirlər aparılsa da, bu xüsusda əhali arasında maarifçilik işləri çox aşağıdır. Bakı şəhəri də daxil olmaqla ölkənin digər şəhərlərində bu istiqamətdə aparılan işlər kifayət deyil. Bəzi hallarda isə tullantıların uzun müddət daşınmaması, habelə yandırılması həmin ərazidə yaşayan əhalinin sağlamlığı üçün böyük problemlər yaradır. Nəzərə alsaq ki, 400 minə yaxın əhalisi olan ölkənin üçüncü böyük şəhəri Sumqayıtda hələ də məişət tullantılarını köhnə üsullarla üstünü torpaqla örtməklə zərərsizləşdirirlər.
Lakin Sumqayıt şəhər icra hakimiyyətindən Xeberle.com-a verilən məlumatda bildirilib ki, "Sumqayıt şəhərində digər sahələrlə yanaşı ekoloji vəziyyətin sağlamlaşdırılması istiqamətində də mühüm addımlar atılır. Hazırda şəhər ərazisində məişət tullantılarının toplanması, daşınması, zərərsizləşdirilməsi və emalı sahəsində müasir standartlara cavab verən sistemin yaradılması məqsədi ilə xarici şirkətlərlə danışıqlar aparılır”.
Ümid edirik ki, digər problemlər kimi məişət tullantılarının zərərsizləşdirilməsi və daşınması problem də qısa müddət ərzində öz həllini tapacaq.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.