Xatırlayırsınızsa, "Azəristiliktəchizat" Açıq Səhmdar Cəmiyyətinin abonentlərə xidmət şöbəsinin müdiri Rafiq Əliyev Xeberle.com-a bildirmişdi ki, Sumqayıt şəhərinin istilik təchizatı ilə bağlı kompleks araşdırmalar aparılıb: "Azərbaycan Respublikası Regionlarının Sosial-İqtisadi İnkişafı Dövlət Proqramları çərçivəsində regionlarla yanaşı, Sumqayıt şəhərinin istiliklə təchiz edilməsiylə bağlı proqram hazırlanıb. Həmçinin Rafiq Əliyev bildirmişdi ki, mərhələli şəkildə həyata keçirilən bu proqram çərçivəsində şəhərin 18-ci mikrorayonunda 30 binanı istiliklə təmin edəcək yeni qazanxana tikilib və bu payız-qış mövsümündə qazanxananın qazlaşdırılıb istifadəyə verilməsi nəzərdə tutulub.

Baxmayaraq ki, artıq "Azəristiliktəchizat” ASC-nin "Sumqayıtistiliktəchizatı” İdarəsi abonentlərinin istiliklə təminatına noyabr ayının 12-dən başlayıb. Lakin sözügedən - 18-ci mikrorayondakı 30 binanı istiliklə təmin edəcək qazanxana hələ də istifadəyə verilməyib. Bu barədə məlumatı dəqiqləşdirmək üçün "Sumqayıtistiliktəchizatı” İdarəsi ilə əlaqə saxladıq. İdarədən bildirildi ki, qazanxanada artıq tamamlama işləri həyata keçirilir və "Azəriqaz” İstehsalat Birliyi ilə də müqavilələr bağlanılıb. Noyabr ayının sonunadək bütün işlər yekunlaşacaq və qazanxana istifadəyə veriləcək.

Xatırladaq ki, Sumqayıt şəhərində 4 mikrorayon, 6 məhəllə və Hacı Zeynalabdin qəsəbəsi də daxil olmaqla, hazırda 24 müasir istilik qazanxanası fəaliyyət göstərir. 215 yaşayış binası, 30 orta məktəb, 14 uşaq bağçası, 14 səhiyyə ocağı istiliklə tam təmin edilir. 24 müəssisə və şirkətin inzibati binasında da istilik sistemi mövcuddur. 215 binada 1005 abonent var.