23 dekabr Türklərin Qədim Türk yurdu, 100 ildir ki, adı Ermənistan olan torpaqlardan zorla və kütləvi şəkildə sürgün edildiyi gündür. 1948-ci ilin məhz bu günü erməni Mikoyanın hazırladığı və SSRİ rəhbəri Stalinin imzaladığı qərarla İrəvan xanlığı ərazilərindən soydaşlarımız zorla deportasiya olunublar.
Türkiyə Respublikasında yaşayan tanınmış yazar Nigar Ögeday bununla bağlı facebook sosial şəbəkəsində kiçik bir video-çarx hazırlayaraq Türk dünyasına müraciət edib. O, hazırkı Ermənistan ərazisi olan İrəvan xanlığı torpaqlarından olduğunu, babalarının məzarlarının düşmən tapdağında qaldığını, bütün nəslinin o yerlərdən sürgün edildiyini dilə gətirib. "Bildiyimiz kimi Stalinin imzaladığı məlum qanlı qərar beş il davam edib. Bu iyrənc siyasət Sovetler birliyinin ozamankı rəhbəri Stalinin ölümüylə durdurulsa da, aradan 40 il sonra - 1988-ci ildə başa çatdırıldı. Əslində Stalin və Mikoyanın məqsədi 1960-cı ilə qədər qədim türk yurdunu türksüzləşdirmək idi. Bir sözlə, ermənilər 40 il sonra türklərsiz Ermənistan arzularına qovuşdular. 1948-dən başlayan sürgün təkcə insanlarımıza qarşı deyildi, eyni zamanda bu torpaqlardakı tariximizə, mənəvi dəyərlərimizə, mədəniyyətimizə qarşı da bir soyqırım idi", - deyən Ögeday ermənilərin qondarma soyqırım deyərək dünyanı ayağa qaldırdığı 1915-ci il təhcir qərarının bir soyqırım olmadığını vurğulayaraq "Soyqırım 1948-53-cü illərdə Türklərə qarşı həyata keçirilən təhcir qərarıydı. Bu gün Ermənistanda bir Türk yoxdur, Türkiyədə isə milyonlarla erməni yaşayır. Elə bunun özü çox şey deyir".
N.Ögeday həmçinin bu günlə bağlı nəinki dünyanın, Türk dünyasının ögey münasibətindən də gileylənib. Xanım yazar 1948-ci il Kırım Tatarları, Ahıska Türkləri və İrəvan türklərinə qarşı həyata keçirilən sürgün və soyqırım siyasətini xatırladaraq "nədənsə Kırım Tatarları və Ahıska Türkləriylə bağlı danışılsa da, İrəvan türklərinə tətbiq edilən bu faciəni kimsə dilə gətirmir. O isə eyni zamanda, bir birinə yaxın yerlərdə türklər oxşar faciəni yaşayıb. Ermənilərin xətrinə dəyər deyə kimsə bizim yaşadığımız faciəni anmaq istəmir. Sosial şəbəkələrdə belə bir cümlə yazmırlar. Təbii ki, bu ögey münasibət bizim canımızı acıdır. Türk türkə fərq qoymamalıdır. Hamımız qardaşıq. Bilirəm, "erməni dərin dövləti” həm Azərbaycanda, həm də dünyada aktivdir. Bu məsələnində gündəmə gəlməsindən çox narahatdırlar. Amma nə olursa olsun biz Ermənistan türklərinin yaşadıqlarını mütəmmadi dilə gətirməliyik. Bunların gələcək planlarına balta vurmaq lazımdır. Mənim torpaqlarımın üzərində dövlət quran erməniyə heç bir zaman dövləti olmadığını xatırlatmayacağımıza qədər, biz çox torpaqlar itirəcəyik" deyə qeyd edib. Nigar xanım son olaraq hər kəsə müraciət edərək bütün dostların bu sürgün və soyqırım qərarını gündəmdə saxlayaraq 70 il öncə başladılan köçürülmə, türklərdən təmizləmə siyasətini qınamağa çağırıb.
Xəbərdən istifadə edərkən istinad etmək vacibdir.