Müğənni Günay İbrahimli ilə yaxından-uzaqdan heç bir tanışlığım yoxdur. Nə pərəstişkarıyam, nə fanatı, nə də azarkeşi. Radioda, televiziyada mahnılarını dinləmişəm. İnsafən bəyəndiklərim də olub. Tanıdığım gündən sonuncu konsertinə qədər də yaxşı mənada başıaşağı, söz-söhbətdən uzaq biri kimi tanımışam. Ən azından bir-birinin büstqalterindən tutub sürüyən müğənnilərdən olmayıb. Amma bütün bunların indi haqqında danışacağım məsələyə heç bir dəxli yoxdur. Son bir neçə efirdir ki, bu gənc xanımın əməlli-başlı “artırdığını” hiss edirəm. Söhbət sənət artımından getmir. Hələ bir neçə ay öncə, “Maşın” realiti şouda iştirak edəndə bu haqda qeydlərimi oxucularla paylaşmaq istəyirdim. Hətta bu barədə “Facebook”da bir status da yazmışdım. Sadəcə, keçmiş prodüseri Təranə Səmədovanın dostyana xahişinə görə fikrimdən vaz keçdim. Amma bu dəfə Müslüm Maqomayev də dirilib xahiş eləsə, xeyri yoxdur. Adam bu səhər efirə çıxıb. Mövzu da geyimlə bağlıdır. Deyir ki, telekanallar şəhərə kamera qoysunlar, görsünlər ki, camaat necə geyinir. Sonra da deyir ki, geyimə nəzarət eləmək lazımdır. Yəni ittihamvari bir çıxış. Təsəvvür edin ki, adam çimərlik geyiminə oxşayan əlbəsədə milyonların qarşısına çıxır, sonra da geyimə nəzarət tələb edir. Tutaq ki, müğənnilərin səhnə geyimlərinə nəzarət edən bir qurum var. Axı bu qurum nəyə nəzarət edəcək? Gərək sənin əynində geyim olsun ki, nəzarət etməyə bir şey tapsınlar da. Axı indi qara uzun libas geyinib Möminə Xatun görkəmi almaqla bu xanım nə demək istəyirdi, onu başa düşmədim. Yəni ki, konsertdə balet paltarında oxuyan mən deyildim? Hə, yaxşı yadıma düşdü. Günay deyir ki, o mənim konsert geyimim idi, gündəlik həyatda belə geyinmirik. Bəyəm konsertdə oxuyan başqası idi? Əgər konsertdə hər şey geyinmək olarsa, yaxud da heç geyinməmək mümkündürsə, növbəti konsertdə ikinci varianta üstünlük vermək olar. Bilirəm ki, indi bəziləri konservator, gerilikçi olduğumu düşünəcəklər. Sonra deyəcəklər ki, çadra altında min oyundan çıxanlar var, ay nə bilim nə. Razıyam. Mən də çadralı, hicablı fahişələrin mövcudluğundan xəbərdaram. Amma onu da nəzərə almaq lazımdır ki, insanlar konsertə pərəstiş elədikləri müğənnini dinləməyə gəlirlər, baletə, yaxud striptiz kluba yox.

/İnterpress.az/

İntiqam Valehoglu