Xeberle.com fevral ayı ərzində Sumqayıt şəhər sakinlərinin Prezident İlham Əliyevə yazdığı məktublardan bir neçəsinin mətnini təqdim edir.
Prezidentin rəsmi saytında yerləşdirilmiş məktublarda Prezident İlham Əliyevin Sumqayıta olan diqqət və qayğısından, şəhərin gündən-günə gözəlləşməsindən, şəhərdə həyata keçirilən abadlıq-quruculuq işlərindən və tələbələrin təqaüdünün artırılmasından razılıq ifadə olunur.
Prezidentin rəsmi saytında yerləşdirilmiş məktublardan bir neçəsinin mətnini təqdim edirik:
Zakir Balamiyevdən:
Hörmətli cənab Prezident.
Son illər ərzində respublikanın hər bir bölgəsində olduğu kimi, yaşadığımız Sumqayıt şəhərində də çox böyük abadlıq işləri görülüb və görülməkdədir. Xüsusilə 2 saylı şəhər xəstəxanasının əsaslı təmiri ilə bağlı Sərəncamınız bu tibb müəssisinə yaxın ərazidə yerləşən Corat qəsəbəsinin sakinlərinin də hədsiz sevincinə səbəb oldu.
Yaşadığımız ərazidə aparılan təmir-bərpa və abadlıq-quruculuq işlərinə görə qəsəbə sakinləri adından Sizə minnətdarlığımı bildirirəm.
Tanrı Sizdən razı olsun. Allah amanında olasınız.
Xanım Əhmədovadan:
Çox hörmətli cənab Prezident.
Mən 50 ildən artıqdır ki, Sumqayıtda yaşayıram. Son illərdə şəhərimiz abadlaşır, gözəlləşir, bir sözlə, inkişaf edir. Bu il şəhərimizin 70 illik yubileyi təntənəli şəkildə qeyd olunacaq. Bu yubiley ərəfəsində Sizin şəhərimizə diqqət və qayğınızın daha bariz nümunəsinin şahidi olduq. Şəhərimizin sosial-iqtisadi, mədəni inkişafına yönələn quruculuq işlərinin aparılması ilə əlaqədar imzaladığınız Sərəncam bütün sumqayıtlıları sevindirdi və qürurlandırdı.
Ömrünün böyük hissəsini gənc nəslin təlim-tərbiyəsinə sərf edən bir müəllim olaraq şəhərimizə göstərdiyiniz diqqət və qayğınıza görə Sizə dərin təşəkkürümü bildirirəm. Çox sağ olun, cənab Prezident! Sizə möhkəm cansağlığı və ali dövləti fəaliyyətinizdə böyük uğurlar arzulayıram.
Zöhrab Süleymandan:
Möhtərəm cənab Prezident.
Bir neçə gün öncə tələbələrin təqaüdlərini artırmağınız bütün tələbələri çox sevindirdi. "Facebook” sosial şəbəkəsində admini olduğum "Azərbaycan Universitetləri” səhifəsində minlərlə tələbə şərhlər yazaraq Sizə təşəkkürlərini ifadə edir.
Ölkəmizin 110 mindən çox tələbəsini sevindirmək Sizin gənclərimizə olan qayğınızın göstəricisidir. Bütün tələbələr adından Sizə təşəkkürümüzü bildiririk. Var olun, cənab Prezident!
Qeyd edək ki, Xanım Əhmədova Sumqayıt şəhər 31 nömrəli orta məktəbin direktoru, Zakir Balamiyev isə Corat Mədəniyyət Evinin keçmiş direktoru və hazırda qəsəbənin Ağsaqqalar Şurasının sədridir.
Xəbərdən istifadə edərkən istinad etmək vacibdir.
