Aprelin 4-də Dini Qurumlarla İş üzrə Dövlət Komitəsinin (DQİDK) Sumqayıt bölgəsi üzrə şöbəsinin və Sumqayıt şəhər Corat qəsəbə məscidi dini icmasının birgə təşkilatçılığı ilə "Aprel zəfəri – xalqımızın qələbə əzminin təntənəsi” mövzusunda tədbir keçirilib.
Tədbirdə DQİDK-nın Sumqayıt bölgəsi üzrə şöbəsinin əməkdaşı Ülvi Məmmədov, Sumqayıt şəhər Corat qəsəbə məscidinin imamı Sahib Məmmədov, ziyalılar, dindarlar və qəsəbə sakinləri iştirak ediblər.
İlk öncə tədbir iştirakçıları Vətən uğrunda canlarını fəda etmiş şəhidlərimizin əziz xatirəsini bir dəqiqəlik sükutla yad ediblər.
Tədbiri giriş sözü ilə açan Sahib Məmmədov bildirib ki, ordumuz 2016-cı ilin aprelində qazandığı qələbə ilə xalqımızın növbəti şanlı tarixini yazmış oldu. Bu qələbə nəticəsində xalqımız bir daha əmin oldu ki, işğal altındakı torpaqlarımızın tamamilə azad ediləcəyi, ərazi bütövlüyümüzün təmin olunacağı gün heç də uzaqda deyil.
DQİDK-nın Sumqayıt bölgəsi üzrə şöbəsinin əməkdaşı Ülvi Məmmədov Aprel döyüşləri zamanı düşmən ölkəyə həm hərbi, həm də siyasi sahədə sarsıdıcı zərbə vurulduğunu qeyd edib. O bildirib ki, məhz bu döyüşlərdən sonra Ermənistanda baş verən siyasi təlatümlər hələ də davam edir.
Daha sonra çıxış edən digər natiqlər də döyüşçülərimizin, Vətən oğullarının Aprel döyüşlərində göstərdikləri şücaətlərdən söhbət açıblar.
Xəbərdən istifadə edərkən istinad etmək vacibdir.
