Sumqayıt şəhər Gənclər və İdman Baş İdarəsinin təşkilatçılığı
ilə "Xəmsə” Milli İntellektual Oyunu üzrə gənclər arasında XI Azərbaycan
Çempionatının şəhər seçim turu keçirilib.
Xeberle.com-a verilən məlumata görə, tədbiri giriş sözü ilə açan Baş İdarənin
rəisi Elgün Hümbətov intellektual oyunun "Azərbaycan gəncliyi 2017-2021-ci illərdə”
Dövlət Proqramının müvafiq bəndlərini icra etmək, gənclərin dünya görüşünü, intellektual
səviyyəsini, zehni inkişafını stimullaşdırmaq, onlar arasında bilik və elmin
nüfuzunu artırmaq, asudə vaxtlarını səmərəli təşkil etmək məqsədilə keçirildiyini
qeyd edib.
Bildirilib ki, Sumqayıt şəhərinin 70 illik yubileyi
ilə əlaqədar Baş İdarə tərəfindən xüsusi Tədbirlər Planı hazırlanıb və gənclərin intellektual və yaradıcılıq fəaliyyətinə həvəsləndirilməsi,
istedadlı, yaradıcı gənclərin üzə çıxarılması və dəstəklənməsi istiqamətində tədbirlər
üstünlük təşkil edəcəkdir.
Yarışmada şəhərin müxtəlif sahələrini təmsil edən 10
komanda iştirak edib. Gərgin və maraqlı şəraitdə keçən bilik yarışının sonunda I
yerə "Paloma”, II yerə "B - 612”, III yerə "Mübariz” (Sumqayıt "Asan” xidmət mərkəzi)
komandaları layiq görülüblər.
Qaliblərə Baş İdarənin kubok, medal və fəxri fərmanları
təqdim olunub.
Xəbərdən istifadə edərkən istinad etmək vacibdir.