Sumqayıt şəhər Gənclər və İdman Baş İdarəsi və
Sumqayıt "ASAN xidmət” mərkəzinin birgə təşkilatçılığı ilə 21 iyun 2019-cu il
tarixində Heydər Əliyev Mərkəzində Sumqayıt şəhərinin 70 illik yubileyinə həsr
olunmuş "İnteraktiv bilik yarışı” keçirilmişdir.
Tədbiri giriş sözü ilə açan Baş İdarənin rəisi
Elgün Hümbətov iştirakçı komandaları salamlamış, ölkə və şəhər rəhbərliyinin gənc
nəslə göstərilən qayğısından və
respublikada dövlət gənclər siyasətinin uğurlu inkişafından, Sumqayıtda
aparılan yenidənqurma və abadlıq işlərindən danışaraq qeyd etmişdir ki, şəhərimizin 70 illik
yubileyi ilə əlaqədar hazırlanmış Tədbirlər Planı uğurla icra edilir. Bildirildi
ki, yarışın məqsədi "Azərbaycan gəncliyi 2017-2021-ci illərdə” Dövlət
Proqramından irəli gələn vəzifələri icra etmək, gənclərin intellektual səviyyəsini
və dünyagörüşünü genişləndirmək, zehni inkişafını stimullaşdırmaqla yanaşı, asudə
vaxtlarının səmərəli təşkili istiqamətində yeni üsullar tətbiq etməkdir.
Sumqayıt "ASAN xidmət” mərkəzinin direktoru Kəmalə Rəhimova çıxışında gənclərin
ictimai fəallığının artırılması və könüllülük fəaliyyətinə cəlb olunması sahəsində görülən işlərdən,
Sumqayıtda
könüllülük fəlsəfəsinin inkişafından danışmış və bildirmişdir ki, şəhərimiz
respublika könüllülük hərəkatına öz töhfəsini verir.
Yarışda şəhərin müxtəlif
sahələrini təmsil edən 17-29 yaş arası gənclərdən ibarət 8 komanda olmaqla, ümumilikdə 40 iştirakçı öz
bilik və bacarıqlarını sınamışdır. Gərgin və maraqlı şəraitdə keçən
bilik yarışının sonunda I yerə Qızıl Aypara Cəmiyyəti Sumqayıt şəhər Bölməsinin
"Qızıl Aypara” komandası, II yerə Sumqayıt "ASAN xidmət” mərkəzinin "Mübariz” komandası,
III yerə Sumqayıt Gənclər Klubunun "Zirvə” komandası layiq görülmüşdür. Qaliblərə
Baş İdarənin kubok, medal, fəxri fərman və hədiyyələri təqdim edilmişdir.
Sonda
yarış iştirakçıları ilə xatirə şəkli çəkilmişdir.
Xəbərdən istifadə edərkən istinad etmək vacibdir.
