SOCAR-ın "Azərikimya” İstehsalat Birliyinin əməkdaşları Sumqayıtda şəhidlərin xatirəsinə ucaldılmış bir sıra abidə komplekslərini ziyarət ediblər.
Xeberle.com xəbər verir ki, kimyaçılar əvvəlcə 1994-cü ildə torpaqlarımızın bütövlüyü uğrunda Füzuli rayonu istiqamətində gedən döyüşlərdə şəhid olmuş Sumqayıt sakini Nadir Sabir oğlu Rzayevin şəhərin 8-ci mikrorayon ərazisində yaradılmış bulaq-abidə kompleksini ziyarət edib, abidə önünə gül dəstələri düzüb, ruhuna dualar səsləndiriblər.
Şəhid Nadirin anası Sürəyya Rzayeva bir müddət əvvəl oğlunun abidə kompleksinin ətrafının abadlaşdırılması haqda "Azərikimya” İstehsalat Birliyinin rəhbərliyinə müraciət edib. Qısa zaman kəsiyində abidənin ətrafı abadlaşdırılıb, ağac və gül kolları əkilib, oturacaqlar quraşdırılıb, səliqə-sahman yaradılıb. Şəhidin anası və qohumları göstərilən diqqətə görə kimyaçılara minnətdarlıqlarını ifadə ediblər.
Sonra kimyaçılar "Azərikimya” İB-nin etilen-polietilen zavodunun qarşısındakı meydançada könüllü olaraq orduya gedib, torpaqlarımızın müdafiəsi uğrunda düşmənə qarşı dəyanətlə vuruşaraq qəhrəmancasına şəhid olmuş 54 kimyaçının şərəfinə ucaldılmış abidə kompleksini ziyarət edib, önünə təzə-tər gül dəstələri düzüb, xatirələrini ehtiramla yad ediblər.
Tədbirdə Azərbaycanda Silahlı Qüvvələrin yaradılması və inkişafı istiqamətində həyata keçirilən işlərdən söhbət açılıb. Azərbaycan ordusunun regionun ən güclü, torpaqlarını azad etməyə hazır və qadir olduğu, dövlət, xalq və ordunun birliyinin sarsılmazlığı dilə gətirilib.
Xəbərdən istifadə edərkən istinad etmək vacibdir.