Son zamanlar bir sıra dövlət məmurlarının özbaşınalıqları haqqında faktlar ortaya çıxır və bunlara prezident İlham Əliyev səviyyəsində reaksiyada verilib.Prezident dəfələrlə bəyan edib ki, harınlamış məmurlara qarşı sərt tədbirlər görüləcək və buna görə hətta bir neçə icra hakimiyyəti başçısı işdəndə azad edilib. 

Amma bu dəfə "gunpress.az” saytına daxil olan məlumat hansısa icra başçısı haqqında yox, Sumqayıt şəhərində 18 saylı el arasında "JEK” dediyimiz MİS-in müdiri Müşviq Baxşəliyevlə bağlıdır. Məlumatda bildirilir ki, bu günlərdə övladına toy edən MİS müdiri on minlərlə manat dəyərində bir məclis təşkil edib. Məclisin ünvanı Bakıda ən bahalı restoran sayılan "Ay işığı”nda olub. Sıradan bir MİS rəhbərinin bu qədər sərvətə sahib olması sözsüz ki, hamını çaşdırıb. Toy məclisində tanınmış müğənnilər də dəvət edilib. Amma ən maraqlı məqam toya təşrif buyuran Xətai rayon icra hakimiyyətinin başçısı Razim Məmmədovla bağlı olub. 

Mənbənin dediyinə görə, Razim Məmmədov əsl dövlət başçısı kimi qarşılanıb, hətta onun gəlişi ilə bağlı yerə qırmızı xalça da salınıb. Görünür, bu cür məclislər hesabına kimin papağının, kimin başında olduğunu aydınlaşdırmaq mümkün olur. Hər halda, başqa bir rayonun icra başçısını özünün rəhbəri kimi qəbul edən adi "JEK” müdirinin belə təmtəraqlı məclis təşkil etməsi qəribə görünməməlidir.