"Hazırda dünyada 159 milyon uşaq qan azlığından əziyyət çəkir".
Bunu UNİCEF-in Azərbaycandakı nümayəndəsi Edvard Karvardin unun effektiv zənginləşdirilməsi üçün potensialın artırılması üzrə keçirilən regional seminarda çıxışı zamanı deyib. Onun sözlərinə görə, Avropa və Mərkəzi Asiyada hər üç hamilə qadından biri qan azlığından əziyyət çəkir ki, bu da həm ananın, həm də körpənin sağlamlığına birbaşa təsir göstərir: "Uşaqların çəkisinin həddindən artıq olması gələcəkdə sağlam həyat tərzi üçün ciddi təhlükələr yaradır. Bu, uşağın yalnız fiziki quruluşuna deyil, həm də idrakının inkişafına, həyatının uzunluğuna təsir edir. Bu, həm də ölkələrə milyard dollarla ziyan vuran məsələdir. Avropa və Mərkəzi Asiya regionunda bu məsələlərlə gündəlik olaraq üzləşirik".
Edvard Karvardin qeyd edib ki, təqribi hesablamalara görə, dəmir çatışmazlığı Avropa və Mərkəzi Asiya regionunda beş yaşadək uşaqların 40 faizə qədərinin sağlamlığına və rifahına mənfi təsir göstərir: "Anemiya uşaqların İQ qabiliyyətini də azaldır. Bu da adambaşına təhsil xərclərinin 14 dollar artması deməkdir. Biz bu məsələni həll etməliyik. Unun dəmir və digər mikronutriyentlərlə zənginləşdirilməsi qan azlığının rastgəlmə səviyyəsinin azaldılmasında özünü xərc baxımından ən səmərəli üsul kimi doğruldub".
Xəbərdən istifadə edərkən istinad etmək vacibdir.