Musa Qasımlı, millət vəkili,
Mətbuat Şurası İdarə Heyətinin üzvü, professor

Azərbaycanın dövlət müstəqilliyinin bərpasından sonra, ötən illər ərzində ölkəmizdə azad mətbuat formalaşıb, senzura yoxdur. Jurnalist nəyi və necə istəyirsə, elə də yazır, heç bir məhdudiyyət qoyulmur. Ölkəmizdə yüksək  məsuliyyəti və qibtə ediləcək dərəcədə peşəkarlığı olan çoxlu KİV rəhbərləri və əməkdaşları var.  Ancaq  bəzi jurnalistlər məlumatların mahiyyətini naşılıqla təhrif edib, yaymaqla milli-dövlət maraqlarımıza ziyan vururlar. 
Bir neçə ay əvvəl Azərbaycan Respublikası Prezidenti Administrasiyasının rəhbəri akademik Ramiz Mehdiyev KİV rəhbərləri ilə keçirdiyi görüşündə dövlətimiz və millətimiz  üçün strateji əhəmiyyət daşıyan bir sıra tövsiyələrini vermişdi. Lakin təcavüzkar Ermənistana məxsus hərbi helikopterin işğal edilmiş ərazilərimizdə törətdiyi təxribatına cavab olaraq vurulması haqqında yayılan xəbərlərlə tanış olarkən  KİV-lərimizdə hələ də çoxlu problemlərin qaldığı qənaətinə gəldim.  
Bəzi saytlarda və televiziya kanallarında həmin xəbər yanlış olaraq təxminən belə dərc edilib və səsləndirilib: "Azərbaycanın hava məkanını pozan erməni helikopteri sərhəddə Azərbaycan ordusunun nəzarəti altında olan ərazilərdən atılan atəşlə vurulmuş və üç erməni hərbçisi həlak olmuşdur”. 
Məlumatı bu şəkildə yayan jurnalist milli-dövlət maraqlarımıza necə ağır ziyan vurduğunun fərqindədirmi? Axı, Ermənistan ilə Azərbaycan arasında quru və hava sərhədi işğal altında olan Ağdamdan başlamır. İşğalçı bir ordunun hərbçisinə "həlak oldu” deyil, "məhv edildi”, "öldürüldü” deyərlər. Hadisənin mahiyyətini  düzgün çatdırmaq lazım idi. Təəssüf olsun ki, bu dəfə də belə olmadı. 
Məncə, həmin KİV-lərimiz hadisə haqqında məlumatı ən azı bu məzmunda yaymalı idilər: "Təcavüzkar Ermənistan ordusu tərəfindən işğal edilmiş Azərbaycanın Ağdam rayonunda təxribat törədərək təmas xəttindəki  mövqelərimizə hücuma cəhd göstərən düşmən helikopteri hərbçilərimiz tərəfindən vurulmuşdur.  İşğalçı ordunun üç hərbçisi məhv edilmişdir”.

P.S. Bu sətirləri yazarkən telekanallardan birindəki "Xəbərlər” proqramında aparıcı belə ifadələri işlətdi: "Dağlıq Qarabağ regionunda və Azərbaycanın işğal edilmiş ərazilərində...”. Məgər Azərbaycanın Dağlıq Qarabağ regionu Ermənistan Silahlı Qüvvələri tərəfindən işğal edilməyib? 
Aşağıdakı kimi deyilməsi gerçəkliyi düzgün əks etdirməzdimi: "Ermənistan ordusu tərəfindən işğal edilmiş Azərbaycanın Dağlıq Qarabağ regionunda və digər ərazilərində...”.(modern.az)