"2019-2020-ci
illər payız-qış mövsümünə hazırlıqla əlaqadar olaraq "Azəristiliktəchizat”
ASC tərəfindən təsdiq edilmiş tədbirlər planlarına uyğun olaraq istilik təchizatı
Sumqayıtda yerləşən obyektlərinin mövcud
qazanxana, istilik şəbəkələri, magistral və məhəllədaxili istilik kəmərləri, nəzarət
ölçü cihazları və avtomatika, qaz, elektrik, nəqliyyat təsərrüfatları və digər
istehsal təyinatlı avadanlıqların mövsümə hazırlanması ilə bağlı tədbirlərin
icrası sona çatıb və "Sumqayıtistiliktəchizat" İdarəsi mövsümə
hazırdır".
Bu barədə Xeberle.com-a açıqlamasında "Azəristiliktəchizat" ASC-nin
"Sumqayıtistiliktəchizat" İdarəsinin abonent və müştəri xidmətləri
üzrə iqtisadçı Binəli Əliyev deyib. Onun
sözlərinə görə, bu gündən artıq xətlərə
istilik buraxılıb və 1-2 günə sistem tam
istiliklə işə başlayacaq. B. Əliyev yaşayış binalarının girişlərinə borclarla
bağlı vurulan elanlara da aydınlıq gətirib.
"Borclu abonentlərimiz hələ də var və binaların bloklarına
bu barədə elanlar vurmuşuq. Lakin heç bir binanın istiliyini kəsmək fikrimiz
yoxdur. Mütəmadi hallar olarsa, sədrin göstərişi ilə çox borcu olan binalara
istilik verilməsi dayandırıla bilər. Amma hal – hazırda bu elanları bunun üçün
vurmamışıq. Sadəcə, arada insanlara xəbərdarlıq olunmalıdır ki, məsuliyyətli
olsunlar. ”
Məlumat üçün bildirək ki, istilik təchizatı ən ucuz xidmət
hesab olunur. Yaşayış sahələrinin bir
kvadrat metri 15 qəpikdir. Belə ki, mənzillərin sahəsindən asılı olaraq 1 otaqlı mənzilin bir aylıq ödənişi
2.5 AZN, 2 otaqlı mənzillər 5 AZN, 3 otaqlılar isə 7.5 AZN təşkil edir.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
