Bəzi həkim-ginekoloqların bildirdiyinə görə, sonsuzluğa yol açan əsas məsələlərdən biri qızların dar paltar, xüsusən də dar cins şalvar geyinməsidir. Səhiyyə işçiləri, bu sıradan oğlanları da xaric etməyiblər. Həkimlərin dediyinə görə, yetkinlik yaşına çatmayan qızlara anaları dar şalvarlar geyindirir. Qızların belə geyimə aludəliyi sonrakı dövrlərdə də müşahidə olunur. Demək olar ki, nəinki Bakıda, hətta bölgələrdə də dar cins şalvar geyinən qızların sayı durmadan artmaqdadır. Bu gün təəssüf ki, anaların özləri də, qızları da, oğlanları da dar şalvara meyl göstərir.

Dar şalvarların sağlamlığımıza, mənəviyyatımıza və cəmiyyətimizə nə kimi təsiri var?

İlk olaraq, məsələyə tibbi nöqteyi nəzərdən yanaşaq. Düzdür, elə həkimlər, səhiyyə işçiləri arasında da dar paltar geyinənlərin sayı az deyil. Bəs həkimlərin "dar şalvar sonsuzluq yaradır" iddiası nə dərəcədə realdır? Əvvəla, ABŞ-da fəaliyyət göstərərn "İnvestigation of Childlessness” dərnəyinin apardığı bir sorğunu nəzərinizə çatdıraq. Adıçəkilən dərnəyin tədqiqat zamanı, əsasən, gənclərin üstünlük verdiyi dar şalvarların sonsuzluq probleminin başlıca səbəbi olduğu üzə çıxıb. Biz isə sizlərə bu şalvarın həm kişilərə, həm də xanımlara olan zərərlərini göstəririk. Dar şalvarların kişilərə zərəri Kişilərin dar şalvar geyməsi isə kişi yumurtalıqlarının (xayaların) bədənə daha yaxın yerdə dayanmasına səbəb olur. Yumurtaların bədəndən daha az temperaturda olması lazımdır, amma dar geyim onları bədənə sıxdığı üçün bədənin temperaturu ilə uyğunlaşır. Bu həm də bəzi hallarda sonsuzluğun başlıca səbəblərindən biri ola bilər.

Dar geyim geyinən kişilərin sonsuzluğunun eyni zamanda bir səbəbi də o geyimlə saatlarla oturaraq işləməsidir. Uzun yol sürücüləri, kompyuter arxasında uzunmüddətli işi olanlar da bu qəbildən olanlardır. Dar geyimlər hüceyrələri korlaşdırır, zəiflədir. Bu cür geyimlərin qan dövranına maneə törətdiyi və bunun da toxumaların və hüceyrələrin korlanmasına səbəb olduğu bildirilir.

Dar şalvarların qadınlara zərəri Qadınların uzun müddət dar şalvar geyməsi damarların sıxılaraq qeyri-normal vəziyyət almasına səbəb olur. Bu cür geyimlər mütəmadi geyinilərsə, rəhm və yumurtalıq xərçənginə də səbəb ola bilər. Daha çox dəbdə olan dar cins şalvarlar, əsasən, bel və mədənin aşağı bölgəsini həddindən artıq sıxdığına görə mədə yırtılmasına, mədə xorasına - qastritə səbəb ola bilər. Əsasən qış aylarında geyilən neylon və sintetik parçalardan hazırlanmış geyimlərin də sağlamlıq baxımından təhlükəli olduğu bildirilir. Tül corablar, günlük həyatımızda istifadə etdiyimiz kapron corablar da bu qəbildən olanlardır.

Əsasən də revmatizm - yel xəstəliyindən şikayəti olanlar bu cür geyimlərlə öz xəstəliklərini daha da qüvvətləndirirlər. Eyni zamanda dar geyimlərin digər bir zərəri də qan dövranına maneə törətməsidir. Bu geyimə görə bədənin bəzi bölgələrinə gec çatan qan insanın üşüməsinə səbəb olur. Qadınların ayaq hissədən daha çox üşüməsi və soyuqlaması bir çox xəstəliyə səbəb olur. El arasında bir məsəl də var, "ayağını isti saxla, başını sərin”. Mütəxəssislər bildirir ki, xüsusilə gənc qızlar buna diqqət etməlidirlər. Amma gözəl olmaq, incə və zərif görünmək məqsədi ilə paltarlar diqqətli seçilmir. Gənc qızların istifadə etdiyi dar paltarların parçaları bədənə yapışdığı üçün soyuq hava birbaşa bədənə təsir edir. Halbuki gen-bol bir şalvar arada hava boşluğu yaradır və çöldəki soyuq hava birbaşa bədənə təsir etmir.

Tez-tez sidiyə gedən, qarın boşluğunda sancılar olan və cinsi orqanından maye gələn qadınlar bu xəstəlikləri məhz dar geyimin sayəsində qazanırlar. İslam Universtetinin müəllimi, axund Hacı Mir Fəyyaz Fəttayev isə bu cür geyinənlərə valideyinlərinin balaları yox, zəmanələrinin övladları deyərək, İmam Əlidən bir hədis gətirməklə başladı: "Düzdür, bu gün cəmiyyətimizdə dar şalvar, cırıq-mırıq şalvar geyinənlərin sayı artıb. Bu da öz növbəsində, çox təəssüf doğuran bir məqamdır. Birincisi ona görə ki, bu cür geyimlər bizim cavanlara yaraşmayan bir geyim tərzidir. İkincisi, bu cür geyimlərin insan orqaniziminə mənfi təsirləri var.

İslam dini də, bu cür geyimlərin əksinədir. Əsas da xanımların dar paltar geyinərək, cəmiyyət içinə çıxmasını dinimiz bəyənmir. Bir dəfə, bir şəxs mənə dedi ki, Hacı, bu cür dar geyimləri geyinmək üçün, iki, bəzən də üç nəfər şalvar geyinənə kömək edir. Əvvəldə qeyd etdiyim kimi, İmam Əli bu cür insanlara ona görə zəmanəsinin övladları deyir ki, indiki cavanlar onlara xeyirli olanlardan çox, cəmiyyətdə gördüklərini istəyərlər. Halbuki, baxmazlar bu, onlara ziyandır ya yox. Cümləmi bir dua ilə bitirirəm, Allah cəmiyyətimizi milli-mənəvi düşmənlərimizdən qorusun”. Sosioloq Bəhruz Camal isə bu şalvarların cəmiyyətimizə nə kimi təsirləri olmasını deyərkən bunları qeyd etdi: "Ümumiyyətlə ,"geyim insanın şəxsiyyətindən xəbər verir” deyə bir anlayış var. Bu deyimlə qismən də olsa razılaşmaq olar.

Əvvəla qeyd edək ki, psixoloji baxımdan natamamlıq komleksi yaşayan fərdlər, həmişə cəmiyyətdə fərqlənmək, özlərini təsdiqləmək üçün müəyyən mənada fərqli geyim və yaxud da rəftar tərzləri ilə seçilirlər. Bəzən də bu rəftar onlarda (psixologiyanın da qeyd etdiyi kimi) şəxsiyyət formalaşan dövrə qədər (18 yaş) aldıqları müəyyən travmalardan qaynaqlanır. Buna görə də belə insanlarda problemin kökü tapılmalı və müəyən terapiya üsulları ilə aradan qaldırılmalıdır. İkinci diqqət olunası məsələ isə geyimlərin insan orqanizminə və sağlamlığına təsiri məsələsidir. Paltarları insanın fiziologiyasına uyğun və ona zərər verməyəcək tərzdə və bədən üzvlərinə münasib formada hazırlanması gərəkdiyi halda təəssüflər olsun ki, bu günki modelyerlər və dəbb bunun tam ziddinədir. Xüsusilə də yetkinlik yaşınaşatmış və ya daha az yaşlı qızlar və oğlanlar buna ciddi şəkildə fikir verməlidirlər. Təəssüflər olsun ki, bu gözlə görülməyəcək zərərlər sonradan elə ağır xəstəliklərə gətirib çıxarır ki, bəzən müalicəsi də mümkün olmur. Digər tərəfdən də müəyyən geyimlər mənəviyyatsızlığa və ictimai pozğunluğa yol açır.

Bəzi geyimlər o cümlədən dar şalvarlar və bənzər geyim formaları əzalarını qabarıq şəkildə əks etdirdiyi üçün qarşı cinsdə (istər kişi, istərsə də qadın) həvəsin və cinsi meyllərin oyanmasına gətirib çıxarır. Hamı çox gözəl bilir ki, insan ehtiraslarının əsiridir. Əgər onları tənzimləmək və idarə etmək qabiliyyətinə malik olmasa, nələrin baş verəcəyi məlumdur. Təəssüflər olsun ki, əksər geyimlər məhz elə bunun üçün nəzərdə tutularaq insan mənəviyyatını terrora yönəldib. Təssüflər olsun ki, bu gün Şərq, xüsusilə də bizim bazarlarda satılan kişi və qadın geyimləri birbaşa mənəviyyatın korlanmasına xidmət edir. Qərbin Şərqi psixoloji blokadaya alaraq onları öz adət və mənəviyyatlarından uzaqlaşdırmaqla öz təsirlərinə yönləndirmələrinə səbəb məzh belə geyimlərdir. Fikir versəniz, Qərb əhalisi bu dönəmi çoxdan geridə qoymuşdur, lakin bu tendensiya Şərqdə günü-gündən daha da aktivləşir. Qərbdə dar şalvarlar, dar paltarlar geyinən insanlara çox az rast gəlmək olar. Onlar adətən geniş və daha rahat paltarlara üstünlük verirlər.

Bir müddət öncə onlarda demokratiya, vicdan azadlığıvə s. adlarla baş qaldıran bu mənəviyyat terroru öz təsirini qoysa da, Qərb insanı ayıldı və yeganə çıxış yolunun mənəvi dəyərlərə bağlanmaqda olduğunu dərk etdi. Təəssüflər olsun ki, demokratiya adı ilə Şərqə sırınan bu siyasətin qurbanları gün-gündən artmaqdadır. Nümunə üçün Qərb və Şərqdəki geyim bazarını müqayisə edin. Şərqdə xüsusilə də ölkəmizdə artıq gənc nəsil üçün geniş, rahat şalvarları əldə etmək demək olar ki mümkün deyil. Ancaq orta yaşlı və yaşlı nəsil üçün nəzərdə tutulan geyimlər arasında belə şalvarlara rast gəlmək olar. Xülasə, bunu demək istərdim ki, istər kişilər olsun, istərsə də qadınlar bu kimi şeylərə diqqət etməli, əvvəla mənəvi, sonra da cismi sağlamlıqlarnın qeydinə qalmalıdırlar. Əgər sabah sağlam cəmiyyətə sahib olmaq istəyiriksə, gərək bu gündən həm mənəvi, həm də fiziki sağlam fərdlərin yetişməsi üçün çalışaq”. (xeberlent.az)