Sərəncama əsasən, bir sıra hakimlər və məhkəmə sədrlərinin vəzifələri dəyişdirilib.

Xeberle.com xəbər verir ki, Sumqayıt şəhər Məhkəməsinə də yeni hakimlər təyin olunub.

Belə ki, 1 saylı Bakı İnzibati-İqtisadi Məhkəməsinin hakimi Məmmədov Elçin Qüdrət oğlu, 2 saylı Bakı İnzibati-İqtisadi Məhkəməsinin hakimi Ələkbərov Əfqan Qəzənfər oğlu tutduğu vəzifədən azad edilərək Sumqayıt şəhər Məhkəməsinin hakimi vəzifəsinə təyinat alıblar.

Sumqayıt şəhər Məhkəməsinin yeni hakimləri yaxından tanıyaq

Ə. Ələkbərov 1978-ci ildə anadan olub. 1999-cu ildə Bakı Dövlət Universitetinin Beynəlxalq hüquq fakültəsinin bakalavr, 2011-ci ildə magistratura pilləsini və 2013-cu ildə isə Naxçıvan Dövlət Universiteti Ali hüquq fakültəsini bitirib. 2001 – 2006-cı illərdə Azərbaycan Respublikası Apellyasiya Məhkəməsində xüsusi işlər üzrə mütəxəssis, 2006 – 2007-ci illərdə isə baş məsləhətçi işləyib. Elə həmin ildən əmək fəaliyyətini Sumqayıt Apellyasiya Məhkəməsində baş məsləhətçi kimi davam etdirib. 2007-2009-cu illərdə isə Sumqayıt Apellyasiya Məhkəməsinin Aparat rəhbəri olub. 2009-2014-cu illərdə Ədliyyə Nazirliyi Təşkilat-nəzarət baş idarəsində baş məsləhətçi vəzifəsində (analitik qrupun rəhbəri) çalışıb. O, burada idarə rəisinin müavini vəzifəsinə kimi yüksəlib. 2018-ci ildən son təyinata qədər 2 saylı Bakı İnzibati-İqtisadi Məhkəməsinin hakimi işləyib.

E. Məmmədov 1969-cu ildə anadan olub. 1994-cü ildə Azərbaycan İnşaat Mühəndisləri Universitetini bitirərək mühəndis ixtisasına yiyələnib. 2006-cı ildə isə Bakı Dövlət Universitetinin Hüquq fakültəsini bitirib. 1994 – 1999-cu illərdə Hərbi Dəniz Qüvvələri Hərbi Məhkəməsində, 2000 – 2001-ci illərdə isə Sumqayıt Hərbi Məhkəməsində məhkəmə iclas katibi olub. 2001 – 2007-ci illərdə Ağır Cinayətlərə dair İşlər üzrə Azərbaycan Respublikası Məhkəməsində məhkəmə iclas katibi vəzifəsində çalışıb. 2007 – 2008-ci illərdə Bakı Apellyasiya Məhkəməsində məhkəmə iclas katibi, hakim köməkçisi və Bakı şəhəri 5 saylı Hüquq Məsləhətxanasında vəkil kimi fəaliyyət göstərib. 2008 – 2011-ci illərdə isə

Bakı Apellyasiya Məhkəməsində hakim köməkçisi vəzifəsində çalışıb. 2011-ci ildən son təyinata qədər isə 1 saylı Bakı İnzibati-İqtisadi Məhkəməsinin hakimi işləyib.