Polis əməkdaşları Yasamal Rayon Polis İdarəsinin rəisi İsmayıl Əsədov da daxil olmaqla rəhbər işçilərin tapşırığı ilə jurnalistləti zorla zaldan çıxarmağa çalışıblar. Amma sakinlər buna etiraz edib.

 Görüşdə çıxış edən baş nazirin müavini Abid Şərifov sakinlərə sakit şəkildə danışmaq xəbərdarlığını edib. Abid Şərifov da jurnalistlərin zaldan çıxarılması təklifi ilə çıxış etsə də sakinlər buna ciddi şəkildə etiraz etdi.

 *    *    * 15:54

 Məmurların “Sovetski” camaatı ilə keçirilən görüşündə iştirak edən müxbirimiz xəbər verir ki, hazırda zalda gərginlik var. Belə ki, polislər məmurların göstərişi ilə jurnalistləri zaldan çıxarmağa başlayanda sakinlər buna etiraz ediblər.

 “Jurnalistləri ona görə zaldan çıxarırsınız ki, problemi gizli şəkildə həll edəsiniz. Açıq-aşkar danışmaqdan, məsələlərin mətbuatda yayılıb xalqa olduğu kimi çatdırılmasından qorxursunuz. Jurnalistlər bayıra çıxmamalıdır. Əgər onları çıxarsanız, biz də çıxacağıq” - deyə sakinlər məmurlara və polisə etiraz ediblər.

 Müxbirmiz bildirir ki, hazırda məktəbdə polislə sakinlər arasında gərginlik var.

 *    *     * 15:26

Bakının Yasamal rayonunun rəhbərliyi və rayondan seçilən deputatlar “Sovetski” məhəlləsinin sakinləri ilə görüşür.

 Görüş “Sovetski”nin sökülməsi planı ilə bağlıdır.

 Virtualaz.org-un məlumatına görə, görüş fevralın 18-i saat 16-da 150 nömrəli məktəbdə keçirilir.

 Görüşdə Yasamal Rayon İcra Hakimiyyətinin başçısı İbrahim Mehdiyev, deputat Ülvi Quliyev, Maliyyə Nazirliyinin nümayəndəsi, ərazinin köçürülməsi üzrə komissiyanın sədri və üzvləri iştirak edəcəklər: “Ərazidə yaşayan insanlarla görüşüb başlayır. İnsanları narahat edən problemləri bir daha eşitmək, dinləmək istəyirik. Köçürülmə məsələsində ortaya çıxan müəyyən problemlərin həlli üçün təkliflər paketi hazırlayırıq. İcra hakimiyyətinin başçısı İbrahim Mehdiyev insanları dəvət edib ki, onları bir daha dinləsin. Sakinlərin dediklərinin hamısı təkliflər paketində nəzərə alınacaq. Görüşün məqsədi insanları dinləməkdir”.

 Xatırladaq ki, fevralın 16-da “Sovetski” məhəlləsində (173 saylı orta məktəbin qarşısında) sakinlərin aksiyası keçirilib. Onlar evlərinin dövlət sifarişi ilə sökülməsi müqabilində təklif olunan kompensasiyanın azlığına (1 kvadratmetr üçün 1500 manat) etiraz ediblər.

 Müxbirimiz bildirir ki, rəsmilərlə görüşə 500-600 nəfər adam gəlib.