“Adambaşına az qala 2 mobil telefon nömrəsi düşdüyü bir vaxtda, mobil rabitənin ölkənin 99.9 %-ni əhatə etdiyi bir vaxtda, mobil danışıq tariflərinin şəhərlərarası mövcud danışıq tariflərindən aşağı olduğu və nəhayət gündəlik həyatımızda artıq ev (stasionar) telefonlarını unutduğumuz bir zamanda onun aylıq abunə tariflərini 25% qaldıraraq 2 manat 50 qəpik etmək, indiki halda telefon çəkilişini də 30 manat etmək görəsən hansı məntiqə əsaslanıb ?”. 
Modern.az xəbər verir ki, bunu yanvarın 1-dən qüvvəyə minən stasionat telefonların yeni aylıq abunə tariflərinə münasibət bildirən ekspert, Azərbaycan İnternet Forumunun rəhbəri  Osman Gündüz bildirib.
Onun fikrincə, bu tariflər həm keyfiyyətli İnternet infrastrukturun formalaşmasının qarşısını alır, həm də uzun illərdən bəri formalaşmış stasionar şəbəkədən effektiv istifadəyə mane olur.

“ Birbaşa İnternet bağlantı xəttinə görə hər 1 km məsafə üçün aylıq 100 manat tarif, şəhərdaxili rəqəmsal xətlərin qoşulması və aylıq istifadəsi üçün ifrat yüksək tariflərin, İSP-lərin istifadə etdiyi xətlər və avadanlıqlar üçün, stasionar telefonlarla bağlı mövcud qarmaqarışıq və hədsiz yüksək tariflərin nə üçün indiyədək saxlanıldığı anlaşılmazdır”-deyə Osman Gündüz bildirib.
 
Onun fikrincə, bu sahədə ciddi qiymət islahatları aparılmalıdır və 2009-cu ildə internet qiymətlərində olan ciddi qiymət endiriminin bu sahəyə də tətbiq edilməsi doğru olardı. 

“Və bunun ardınca da fikrimcə həm ev (stasionar) və həm də mobil telefon danışıqlarının , internetin, o cümlədən mobil internetin tariflərinin endirilməsinə, provayderlər tərəfindən istifadəçilərin “çəkidə“ aldadılmasının qarşısının alınmasına diqqət yetirilməlidir. Nəzərə almaq lazımdır ki hazırda bizim cəmi bir neçə Mb/san üçün ödədiyimiz 10-15 manata qonşu ölkələrdə 50 Mb/san əldə etmək mümkündür.
Cari ildən həm də 105 milyon manatlıq “Hər evə optika” layihəsinə start veriləcək, şəhərdə hər bir binaya, hər bir kəndə fiber-optik xətlərin çəkilməsinə başlanacaq. Dövlətə məxsus yeni bir fiber-optik infrastruktur formalaşacaq. Bu infrastrukturdan effektiv istifadə üçün həm əlverişli tarif siyasəti və həm də liberal və effektiv qaydalar hazırlanmalıdır”.