Dövlət Sosial Müdafiə Fondunun (DSMF) sədri Elman Mehdiyev bu gün fondun Sumqayıt şöbəsinin inzibati binasında sosial sığorta ödəyicilərini və pensiyaçıları qəbul edib.
Qəbulda Sumqayıt şəhərinin, Qubadlı, Xızı və Qobustan rayonlarının sakinləri iştirak ediblər.
AzərTAc xəbər verir ki, “Açıq qapı” formatında keçirilən qəbula gələn bütün vətəndaşların müraciətləri operativ qaydada araşdırılmış və onların bir qismi yerindəcə həll edilib.Bir sıra müraciətlər müəyyən dəqiqləşmələr, araşdırma tələb etdiyindən müvafiq tədbirlərin görülməsi barədə şəhər və rayon şöbələrinin rəhbərlərinə, fondun digər vəzifəli şəxslərinə tapşırıqlar verilib.
Vətəndaşların müraciətləri əsasən pensiyaların yenidən hesablanmasının bir sıra hüquqi aspektlərini əhatə etmişdir. Bir qismi isə pensiya növünün dəyişdirilməsi, güzəştli şərtlərlə yaşa görə pensiya təyinatı, fərdi şəxsi hesablarda qeydə alınan pensiya kapitalları, sosial sığorta və digər məsələlərlə bağlı olub. DSMF-nin səlahiyyətinə aid olmayan müraciətlər müvafiq qurumlara çatdırılmaq üçün qeydiyyata alınıb.
Xəbərdən istifadə edərkən istinad etmək vacibdir.
