"Nəqliyyatda sosial məsafəni saxlamaq üçün avtobuslar və metro
yarıboş çalışmalıdır, bunun üçün yüzlərlə yeni avtobus, metro qatarları
alınmalıdır. Hökumət buna hazırdımı?! Alınacaq yeni avtobuslar və
qatarlar nəqliyyatda gediş haqqına təsir edəcəkmi?! Metro rəhbərliyi
zatən gediş qiymətinin 50 qəpik olması istəyir - koronavirus buna bahənə
olamayacaq ki?"
Bu fikirləri
iqtisadçı ekspert Natiq Cəfərli öz şəxsi hesabında paylaşıb. Paylaşılan
məlumat isə aidiyyəti qurum tərəfindən heç də birmənalı qarşılanmayıb.
Məsələ ilə bağlı Correct.az -a açıqlama verən "Bakı Metropoliteni"
QSC -nin mətbuat xidmətinin rəhbəri Bəxtiyar Məmmədov bildirib ki,
metroda gedişhaqqının qaldırılması qətiyyən gündəmdə deyil və yeni
qatarların alınması zərurətinin olması isə əsassız iddiadır:
"Gedişhaqqının artırılması və 50 qəpik olması gündəmdə deyil.
Bu məsələni ümumiyyətlə yada düşən, müzakirə olan mövzu belə deyil.
Növbəti iddiada deyilir ki, sərnişin sayı az olduğuna görə yeni qatarlar
alınmalıdır. Bu iddia da əsassızdır. Hazırda sərnişin sayı az olsa da
metropoliten texniki cəhətdən mümkün olan ən sıx qrafikdə çalışır. Bu da
o deməkdir ki, metropolitenin vaqon parkı və qatar sayı kifayət
qədərdir.
Yəni, yeni qatarların alınmasına heç bir zərurət yoxdur. Yeni
qatarların alınması məsələsinə gəlincə isə qatarlar iki halda alına
bilər. Birinci, qatarlar istismar müddətini başa vurduqda, ikinci halda
isə yeni metro stansiyaları fəaliyyətə başlayanda. Ötən ildən
açıqladığımız kimi bu il 20 yeni vaqon alınacaq. Yəni biz bunu elan
edəndə heç pandemiya da yox idi. 3 illik müqavilə imzalanmışdı,
müqaviləyə uyğun olaraq hər il 20 vaqon, ümumilikdə isə 60 vaqon
ölkəmizə gətiriləcəkdi. Bu da ümumilikdə 12 qatar edir". (Correct.az)
Xəbərdən istifadə edərkən istinad etmək vacibdir.
