Metro stansiyalarının girişində ticarət yenidən bərpa olunacaq. İndi bir neçə stansiyada təmir işləri aparılmasına hazırlıq gedir. O da bildirilir ki, təmirdən sonra stansiyalarda yeni ticarət obyektləri qurulacaq. Müasir standartlara uyğun, metronun görünüşünə, interyerinə və sərnişinlərin hərəkətinə mane olmayacaq ticarət köşlklərinin qurulması planlaşdırılır. Artıq belə köşklərin layihələşdirilməsi üzərində iş gedir.

Ticarətin bərpa olunmasının əsas səbəblərindən biri isə bu yolla, Metropolitenə vəsait cəlb etməkdir. Hələ keçmiş rəis Tağı Əhmədov deyirdi ki, metro dotasiya ilə işləsə də, metronun xərclərini bağlamaq üçün ya gediş haqları qaldırılmalıdır, yaxud da kənardan bu cür vəsaitlər cəlb olunmalıdır. Görünür yeni rəis Zaur Hüseynov üçün də artıq bu məsələ aktuallaşıb. Metronun xərclərini qarşılamaq üçün müəyyən vəsaitlərin cəlb edilməsi zərurəti yarandığından ticarət obyektlərinin bərpa olunması gündəmə gəlib. Qeyd olunur ki, ticarət köşklərinin fərqli dizaynı hazırda müzakirə edilir. İlk növbədə, ticarət obyektlərinin profilinin müəyyənləşdirilməsi üzərində iş gedir. Bunun eksperiment kimi ilk növbədə «Koroğlu» stansiyasından başlanılması planlaşdırılır. Məlumatı dəqiqləşdirmək üçün "Bakı Metropoliteni" QSC-nin mətbuat xidməti və ictimaiyyətlə əlaqələr şöbəsinin rəisi Nəsimi Paşayevlə əlaqə saxladıq. O, bildirdi ki, hazırda metroda ticarət obyektlərinin quraşdırılması müzakirə mövzusu deyil. Siz bu məlumatı haradan əldə etmisiniz? Belə bir məsələ gündəmdə yoxdur.” (analitik.az)