Rəsmi statistikaya əsasən ölkə üzrə 2015-ci ildə 805 uşaq övladlığa götürülüb ki, onlardan 375-i qız uşağıdır. 2016-cı ildə isə 773 uşaq "yeni valideynlərini tapıb" və onlardan 371 nəfəri qız uşağı olub. Bundan başqa, əcnəbi vətəndaşlar tərəfindən ölkəmizdən övladlığa götürülən uşaqlar da vardır. Belə ki, rəsmi statistikaya əsasən Ailə, Qadın və Uşaq Problemləri üzrə Dövlət Komitəsinin rəyi əsasında 2017-ci ildə 9 uşaq (6 qız, 3 oğlan) əcnəbi vətəndaşlar tərəfindən övladlığa götürülüb.

Bəs övladlığa uşaq götürən ailə hansı şərtlərə əməl etməli və hansı xüsusiyyətlərə malik olmalıdır?

Ailə, Qadın və Uşaq Problemləri üzrə Dövlət Komitəsindən Xeberle.com-a verilən məlumata görə, övladlığa uşaq götürmək istəyən şəxs ilk növbədə yerli icra hakimiyyəti orqanında bunu arzu edən şəxs kimi qeydiyyata alınmalıdır:

"Bunun üçün övladlığa uşaq götürmək istəyən şəxs Azərbaycan Respublikası Nazirlər Kabinetinin 20 sentyabr 2000-ci il tarixli, 172 saylı qərarı ilə təsdiq edilmiş "Valideyn himayəsindən məhrum olan və övladlığa götürülən uşaqların uçot qaydalarının, uşaqları övladlığa götürməyi arzu edən şəxslərin uçot qaydası”nın IV hissəsinin 3.1-ci bəndinə əsasən aşağıdakı sənədləri icra hakimiyyətinə təqdim edir:

- şəxsiyyətini təsdiq edən sənədin surəti;

- qısa tərcümeyi-hal;

- övladlığa götürməyə imkan verməyən xəstəliyinin olmaması barədə tibbi arayış;

- ümumi səhhəti barədə tibbi arayış;

- yaşayış sahəsi barədə məlumat (yaşayış sahəsinə mülkiyyət hüququnu təsdiqləyən sənəd);

- ailə vəziyyəti barədə məlumatlar (nikah haqqında şəhadətnamənin surəti, nikahın pozulması haqqında şəhadətnamənin surəti);

- iş yeri (vəzifəsi), əmək haqqı və başqa gəlirləri haqqında məlumat.

Sonrakı mərhələdə vətəndaşa onun arzuladığı əlamətlərə uyğun (yaşı, cinsi, gözlərinin rəngi) uşaq seçməsinə imkan yaradılır. Belə ki, övladlığa götürülməsi mümkün olan valideyn himayəsindən məhrum olan uşaqlar Qəyyumluq və Himayəçilik Orqanında ilkin uçota, Səhiyyə Nazirliyi və Təhsil Nazirliyində isə müvafiq yaş həddinə uyğun olaraq mərkəzləşdirilmiş uçota alınır. Adları qeyd olunan qurumlar şəxsə övladlığa uşaq götürmək üçün kömək göstərir.

Sonuncu mərhələdə övladlığa uşaq götürmək istəyən şəxs övladlığa götürmək üçün tələb olunan sənədlərlə birgə övladlığa götürüləcək uşağın daimi yaşadığı rayonun məhkəməsinə ərizə ilə müraciət edir. Məhkəmədə işə baxılarkən Qəyyumluq və Himayə Orqanının rəyi tələb olunur. Məhkəmə Qəyyumluq və Himayə Orqanının rəyini nəzərə almaqla uşağın övladlığa götürülməsi barədə qətnamə çıxarır.

Uşaq valideyn himayəsindən məhrum olmadıqda onun övladlığa verilməsi bioloji valideynlərin razılığı və qəyyumluq himayə orqanının rəyi nəzərə alınmaqla məhkəmə qaydasında həyata keçirilir. Yalnız məhkəmənin qətnaməsi qanuni qüvvəyə mindikdən sonra (1 ay) uşaq övladlığa götürmək istəyən şəxsə verilə bilər”.

Elnarə Salamova

Xeberle.com