Xeberle.com xəbər verir ki, tədbirdə Birliyi AAB-nin sədr müavini, dosent Altay Məmmədli və şöbə müdiri Şahniyar Əliyev təmsil etdilər.

Dövlət himni səsləndikdən sonra, Azərbaycan torpaqlarının azadlığı və bütövlüyü uğrunda canlarından keçən qəhrəman oğulların - Şəhidlərimizin əziz xatirəsi bir dəqiqəlik sükutla yad edildi.

Tədbiri giriş sözü ilə açan, AAB-nin, həmçinin AYB və AJB-nin üzvü, jurnalist, yazıçı-publisist Aygün Hacıyeva, qonaqları salamladıqdan sonra, sözü AYB-nin SRB-nin sədri Çərkəz Qurbanova verdi. Ç.Qurbanov AYB-nin sədri, Əməkdar elm xadimi, professor Məhərrəm Qasımlının bölməyə, həmçinin aşıqlara göstərdiyi diqqət və qayğını xüsusi vurğulayaraq qeyd etdi ki, "bugünkü tədbirin keçirilməsinin təşəbbüskarı da məhz Məhərrəm müəllimdir”. O, həmçinin bölmənin yaranma tarixindən, özünün yeni təyinatınacan görülən işlərdən, gələcək planlardan danışdı.

    Tədbirdə Birliyi təmsil edən; AAB-nin sədr müavini, dosent Altay Məmmədli və şöbə müdiri Şahniyar Əliyev çıxışlarında Aşıq sənətinin tarixindən, ustad aşıqların yaradıcılığından söz açdılar. O da qeyd olundu ki, "son dövrlərdə aşıq sənətinin dunyada tanıdılması, inkişaf etdirilməsi H.Əliyev Fondunun prezidenti, YUNESKO və İSESKO-nun xoşməramlı səfiri Mehriban xanım Əliyevanın adı ilə bağlıdır. Məhz onun sayəsində, 2009-cu ildə aşıq sənəti YUNESKO-nun qeyri-maddi irs siyahısına daxil edildi. Bu, böyük uğurdur! Artıq Azərbaycanda saz-söz sənətinə yüksək dəyər verilir, müsiqi üzrə orta-ixtisas və ali təhsil ocaqlarında aşıq sənəti tədris olunur, müxtəlif müsabiqələr keçirilir...”. Daha sonra çıxışçılar bölmənin gələcək fəaliyyətində dəstəklərini əsirgəməyəcəklərini bildirdilər və xeyir-dualarını verdilər.

Açılışda iştirak edən qonaqlardan Sumqayıt Poeziya Evinin direktoru, şair İbrahim İlyaslı, 44 günlük Vətən müharibəsi Şəhidlərinin valideynləri – Rauf İbadovun atası Məhərrəm İbadov və Rüfət Əhmədzadənin anası Ruhiyyə Əhmədova, İctimai xadim, Beynəlxalq Sülh səfiri Yasəmən Möhübbətqızı, Corat Bələdiyyə sədrinin müavini Nuradə Kərimova, tanınmış pedaqoq Solmaz Sultanova, pedaqoq-jurnalist Akif Həsənov, şair-yazıçı Elbrus Qayalı və digərləri çıxış edərək, bölmənin gələcək fəaliyyətində aşıqlara uğurlar dilədilər. Birliyin gənc, istedadlı aşıqları – SRB-nin sədr müavini Şəhriyar Şahverdiyev və Sumqayıt Musiqi Kollecinin müəllimi Elçin Rəşidoğlu fikirlərini söyləməklə yanaşı, öz arzu və təkliflərini də bildirdilər.

Tədbir zamanı, AAB-nin sədri Məhərrəm Qasmlının əmri ilə, birliyə üzv seçilən gənc aşıq Əfsanə xanıma Altay Məmmədli tərəfindən vəsiqə təqdim olundu.

SRB-nin adına hazırlanmış tort kəsildikdən sonra, qonaqlar çay süfrəsi arxasında ustad və gənc aşıqların ifalarını dinlədilər.

Aşıqlardan Zərgər Abbasın, Nəriman Abbasovun, Mərkəz Qurbanovun, Cəmil Muradovun, Ələsgər Məmmədovun, Azər Fərmayıloğlunun, Mehman Abbasovun, Ceyhun Nağıyevin, Əlsəfa Zərbəliyevin, İlqar Şirinovun... və başqalarının səsləndirdikləri aşıq havaları tədbir iştirakçılarına Bahar ab-havasının gözəlliyini yaşatdı. Xanım aşıqlardan Həvva Nəsiblinin, Zəminə Rüstəmovanın və Əfsanə xanımın çıxışı tədbirə xüsusi rəng qatdı.

Tədbir, həmin günün xoş xatirəsi olaraq, şəkillərin çəkilməsi ilə yaddaşa həkk olundu.

P.S.: Biz də öz növbəmizdə, AAB-nin Sumqayıt Regional Bölməsinin kollektivini ürəkdən təbrik edir, bol yaradıcılıq uğurları arzulayır, yeni məkanda bir-birindən maraqlı tədbirlərin keçirilməsini diləyirik!