Məlumdur ki, təbabətin həkim-terapevti daxili orqanların və sistemlərin xəstəlik mexanizmlərinin, onların diaqnozunun, müalicəsinin və profilaktikasının səbəbli əlaqələrini öyrənən mütəxəssisdir. Belə mütəxəssislərdən biri şəhərimizdə öz sahəsinin gözəl bilicisi kimi tanınan, təcrübi-praktik bacarığını sərgiləyərək terapevt kimi özünəməxsus xidmətləri ilə seçilən Nigar Nizami qızı İsayevadır.

O, 1980-ci il fevralın 7-də Qazax şəhərində anadan olub. Ziyalı mühitində böyüyüb. 1996-cı ildə Sumqayıt şəhər 21 nömrəli tam orta məktəbi müvəffəqiyyətlə bitirib. Həmin ildə Azərbaycan Tibb Universitetinin müalicə işi fakültəsinə daxil olub. Peşəsinin sirlərinə yaxından, mükəmməl yiyələnərək 2002-ci ildə həmin ali təhsil ocağını bitirib. Bir il Sumqayıtdakı 1 nömrəli şəhər xəstəxanasında internatura keçib. Sonra həmin xəstəxanada həkim-terapevt kimi çalışıb. 2019-cu ilin yanvar ayından Terapiya şöbəsinin müdiri vəzifəsində işləyir. Bir çox elmi-praktik konfranslarda iştirak edir. Gözəl ailəsi var, Fidan və Ayan adında iki qız övladı böyüdür.

Xəstələri hər zaman Nigar həkimdən razılıq edir, ona böyük inam, ümid bəsləyirlər. Mehribanlığı və xoş rəftarı onun xəstələrə olan qayğısının bir simvoludur desəm, yanılmaram.

Həmsöhbətim deyir ki, uşaqlıqdan anam Minayə müəllimin ən böyük arzusu idi həkim olum, insanların sağlamlığı keşiyində dayanım. Bəli, bu arzuya çatdım, valideynlərimi sevindirdim.

Nigar həkim söhbət əsnasında bildirir ki, hazırda mühüm tibbi proseslərə və yeniliklərə kifayət qədər diqqət yetirilir. Son tibbi avadanlıqların və peşəkar həkim heyətinin səyləri nəticəsində ən ağır və riskli sayılan açıq əməliyyatlar aparılır. Əvvəllər əhali müayinə və müalicə üçün xaricə üz tuturdusa artıq insanlar öz ölkəmizdə müayinə və müalicə olunurlar. Tibbi sığortanın tətbiqi isə xəstə məmnunluğunu əlçatan edib.

Nigar həkim həmçinin əlavə edir ki, rəhbərlik etdiyim terapiya şöbəsi geniş profillidir. Burada pulmonoloji, qastroenteroloji, gemotoloji, endokrinoloji və digər profilli xəstələrin müalicəsi ilə məşğul oluruq. 37 nəfər tibb personalımız əhalinin sağlamlığı keşiyində dayanır.

Peşəkar həkim, mütəxəssis kimi xəstələrə əsl həyat eşqi verən Nigar xanıma daim yüksək zirvələrdə olmasını arzu edirik.