Yeni ilin gəlişinə artıq bir neçə gün qalıb. Bayram yaxınlaşdıqca, vətəndaşlara xidmət göstərmək istəyən Şaxta baba və Qar qız namizədlər tələsməyə başlayıblar. 

Bəs, namizədlərin seçim turundan keçməsi üçün nə etməsi lazım olacaq?

Dənizkənarı Milli Bulvar İdarəsinin rəis müavini Nazim Məcidovun verdiyi məlumata görə, Yeni il qabağı bulvarda bir neçə yerdə müxtəlif ölçülü Şam ağacları quraşdırılacaq.

Şaxta baba və Qar qızların seçiminə isə həmin ağacların quraşdırılması prosesi bittikdən sonra başlanılacaq.

"Dünəndən etibarən ağacların quraşdırılması prosesi başlayıb. Proses başa çatdıqdan sonra seçimlərə start verməyi düşünürük.

Ehtimallara görə, bu tarix dekabr ayının 20-dən start götürəcək. Seçim də həmişə olduğu kimi eyni qaydalarla aparılacaq.

Şaxta baba və Qar qızlar işə götürülərkən onların görkəmlərinə diqqət yetiriləcək. Şaxta baba ucaboy, Qar qız isə incə olmalıdır. Bununla yanaşı seçimlərdə namizədlərin intellektual səviyyəsinə də xüsusi diqqət ediləcək.

Şaxta baba və Qar qız nağıllar bilməli, ən əsası da uşaqlarla rəftar etməyi bacarmalıdırlar. Onların sağlam olması, hər hansı yoluxucu xəstəliklərinin olmaması da əsas məsələlərdəndir. Bu iş üçün müraciət edənlər şəxsiyyət vəsiqəsi və mütləq şəkildə sağlamlıq haqda arayış təqdim etməlidir”.

Qeyd edək ki, Şaxta baba və Qar qız olmaq istəyən namizədlər Bakı Şəhər İcra Hakimiyyəti Ticarət və Xidmət Departamenti və Bulvar idarəsinə müraciət etməlidirlər. (ölkə.az)