İki həftədən sonra ölkədə Yeni il bayramı qeyd olunacaq. Bu isə öz növbəsində nəqliyyat, enerji və qaza olan tələbatı daha da artıracaq.

Beynəlxalq Avtovağzal Kompleksinin növbə rəisi Məhəmməd Abdullayev:

- Yeni il bayramı ilə əlaqədar Bakı Beynəlxalq Avtovağzalı dekabrın 27-dən (şənbə günü) yanvarın 5-dək gücləndirilmiş iş rejimində fəaliyyət göstərəcək. Bayram günlərində 15 minə yaxın sərnişin daşınacaq. Buna görə də marşrutlara buraxılacaq avtobusların sayının iki dəfə artırılması nəzərdə tutulub. Belə ki onların sayı 700-dək çatdırılacaq.

Qiymətlə bağlı məsələyə də ciddi nəzarət olunacaq. Sərnişinlərə də tövsiyə edirik ki, kassalardan bilet alsınlar.

"Azərbaycan Dəmir Yolları” SC-nin mətbuat katibi Nadir Əzməmmədov:

- Dekabrın 29-dan etibarən dəmir yolu gücləndirilmiş iş rejimində fəaliyyət göstərəcək. Sərnişinlərin sıxlığını nəzərə alaraq, xəttə əlavə vaqonlar qoşulacaq. Gücləndirilmiş iş rejimi yanvarın 5-dək davam edəcək.

Sərnişin sıxlığını nəzərə alaraq Bakı-Tiflis istiqamətində əlavə turist qatarı buraxacaq. Bu, dekabrın 29-da və 30-da baş tutacaq.

"Bakıelektrikşəbəkə” SC-nin mətbuat xidmətinin rəhbəri Tanrıverdi Mustafayev:

- "Bakıelektrikşəbəkə” ASC-nin əməkdaşları 31 Dekabr Dünya Azərbaycanlılarının Həmrəylik Günü və Yeni ilin bayram günləri gücləndirilmiş iş rejimində çalışacaqlar. Bununla bağlı SC İdarə Heyətinin sədri sərəncam imzalayıb.

Bayram və istirahət günlərində enerji istehlakçılarının, bayram tədbirlərinin keçiriləcəyi yerlərin fasiləsiz elektrik enerjisi ilə təchiz olunmasını, habelə baş verə biləcək qəza hadisəsinin qarşısının alınması üçün zəruri tədbirlərin görülməsi təmin ediləcək.  Abonentlərdən xahiş olunur ki, yarana biləcək hər hansı problemlər haqqında "199 - Qəza Xidməti”nə zəng vuraraq məlumat versinlər.

"Azəriqaz” İstehsalat Birliyi:

- ARDNŞ "Azəriqaz” İB Dünya Azərbaycanlılarının Həmrəyliyi Günü və Yeni il bayramı münasibəti ilə dekabrın 31-dən etibarən gücləndirilmiş iş rejimində çalışacaq. İB-də bütün zəruri tədbirlər görülüb və növbəli iş rejimi tətbiq olunacaq. 

Ümid edirik ki, mövqelərini öyrəndiyimiz qurumlar öz vədlərinə əməl edəcəklər. (lent.az)