AZADİNFORM-un “Uğurun sirri” layihəsinin növbəti qonağı əməkdar artist, tanınmış aktrisa Naibə Allahverdiyevadır. 

Naibə Allahverdiyeva: “Yağışa düşənin yağmurdan nə qorxusu..?”

Naibə xanım, uğurun rəngi, dadı, qoxusu, səsi, görüntüsü necədir və ona toxunmaq nə zaman mümkündür?

- Uğur insan həyatının loqosudur. Ona görə insanlar ona bu qədər bağlıdırlar. Mən uğuru raduqaya bənzədirəm. Çünkü bu yolda insan hər rənglə üzləşir. Müasir zamanda “uğur kişi” yaman dəyişib. Əvvəllər onun qəbuluna düşmək üçün zəhmət və  istedad  lazım  idisə, indi pul lazımdır. Uğurun dadı qaçıb, rəngi isə qarışıb. İnqubator toyuqlarının dadını verir.  Qoxusuna gəlincə isə vardı. Amma burnumun hissiyatı ölüb. Heç nə hiss eləmirəm.

Hissiyyatınızı nə öldürüb?

- Cəmiyyətdə olan bir bəla - paxıllıq, pul düşkünlüyü, acgözlük.

Bu bəladan qurtulmaq üçün nə etməliyik və sadaladıqlarınız həmişə olmayıb ki? 

- Olub. Amma barmaqla sayılacaq qədər. Əvvəllər elə insanlara hörmət etməzdilər. Salam verməyə belə qorxardılar. İndi isə əksinə. Təmiz adamlar barmaqla sayılır.  

Əvvəlkinə geri dönmək üçün nə etməliyik? Ümumiyyətlə, pulu çox olan birisinin istedadı və zəhməti yoxdursa o nə qədər yol gedə bilər ki?

- Geriyə yol yoxdur. Sadəcə təfəkürümüz dəyişməlidir. Biz qəlbimizdə yaşayan iblisi məhv edib sevgi mərhəmət mələyini yaşatmalıyıq. İnsanlar çox dəyişib. Bunu düşündükcə kədərlənirəm. Dünya divanə bir dünya olub. Deyirlər, dünyanın axırı gələcək. Məgər bəşəriyyətin bu bəziyyətə düşməsi dünyanın axırı deyilmi?

Biz özümüz dəyişmək istəmişik yoxsa bizi dəyişdiriblər?

- Həyat insanı dəyişdirə bilər. Amma qəlbini yox. Sadəcə insanda inam itə bilər və özünü müdafiə etmək üçün olduğundan başqa cür görünməyə çalışar.

Deyirlər, yanlışlar olmadan doğrular tapılmaz. Uğursuzluq yanlışlardanmı doğar?

- Təbii ki... Kiçik bir yanlışlıqdan insan bəzən həyatını da itirə bilər və yaxud da böyük uğurlar qazanmağa da sövq edər.

Apardığınız mübarizədə uğursuzuqlarla üzləşəndə nə edirsiniz? 

- Mən alın yazısına çox inanıram. Uğursuzluqla üzləşdikdə əvvəl depresiyaya düşürəm. Papağımı qarşıma qoyub fikirləşirəm və öz-özümə deyirəm: “Ay Naibə, onsuzda sən həyatda hər şeyi mübarizə edə-edə qazanmısan”. Həm də, “yağışa düşənin yağmurdan nə qorxusu?” sualını özümə verərək ayağa qalxıram. Fürsətdən istifadə edib öz pərəstişkarlarıma minnətdarlığımı bildirirəm. Onlar olmasaydı bəlkə də çoxdan məhv olardım.

Hər insanda bir istedadın olduğunu söyləyərlər, bunu necə üzə çıxarmaq olar sizcə? 

- İstedad xəmir kimidi. Nə qədər də onu ovucunda sıxsanda o barmaqların arasından pırtlayıb çıxacaq. 

Bəzi gənclər bir işə başlayanda “Düşün, tətbiq et və nəticələndir” prinsipini unudurlar. Yəni, onlar düşündüklərini ya tətbiq etmir, ya da nəticələndirmirlər. Bu problemlə üzləşənlərə nə söyləmək istərdiniz?

- Gənclərimizə uğurlar arzu edirəm. Həyat enişlə, yoxuşla doludur. Bundan qorxmasınlar. Ancaq irəli! 

Qarşısındakına “əhəmiyyətlisən” mesajını verməkdə çətinlik çəkənlərə nə söyləmək istərdiniz? 

- Nə tökərsən aşına o da çıxar qarşına. Sevərsən sevilərsən. Dəyər verərsən dəyərli olarsan.

Övladlarınızın gələcəkdə uğurlu ola bilməsi üçün nə edirsiz? Daha fərqli davrana bilirsiniz?

- Əsl analar kimi davranıram.

Sizcə insanların ən güclü silahı nədir -ağıl, yoxsa ürək? 

- Dünyanı  elə məhv edənlər də ağıllı adamlar oldu. Dünyanı yalnız məhəbbət xilas edəcək. O isə ürəkdə yaşayır. 

Uğurun yaşı olur  yoxsa başı, bu barədə nə düşünürsüz?

- Uğurun  yalnız  şansı  var.

Fərqliliyiniz və fərdliliyiniz haqında nə deyə bilərsiz? 

- Fərqli olduğum üçün bu qədər insan sevgisinə düçar olmuşam.

İnanmaq asandır, yoxsa inandırmaq? 

- Hər ikisi  çətindir.

Həyatın enini və uzununu ölçdünüzmü heç,  yaşamı üzün edən nədir sizcə? 

- Qəlb. Ölçünü isə itirmişəm.

Əgər Sizə dünyada yalnız bir şeyi dəyişdirmək imkanı verilsəydi, nəyi dəyişdirərdiz?

- Bu dünyaya gəlməzdim. Gəlsəydim də azad bir quş olmaq istəyərdim.

Həyat toplananlar, çıxılanlar, vurulanlar və bölünənlərdən ibarətdir deyirlər, Sizin payınıza ən çox hansı əməl düşüb? 

- Bu barədə fikirləşməmişəm.

Bəs, Siz özünüz-özünüzə dost ola bilsəydiniz, özünüzə Sizin kimi bir dost istəyərmiydinizmi? 

- Bəli. Çünkü mən dosta xəyanət etmirəm.

Uğurlu olmaq istəyənlərə gərəkli ola biləcək bir məsləhət versəydiniz,  nə deyərdiniz? 

- Qəlbini qoru. Həmin kəs uşaqdırsa: körpə təmizliyini qoru, lap qocalsan belə.

Dəlinin doğru xəbəri nə olar sizcə? Dəliliyin gözəlliyi mümkünmü? 

- Azadlığın sinonimi gözəllikdir. Divanə insan bizə məxsus olan və bizi bu həyatda buxovlu yaşamağa məcbur edən bir çox xüsusiyyətlərdən uzaqdır. O azaddır. Onda nə qorxu, nə də ki, təmənna var. Sözünü deyib, ürəyini boşalda  bilir.

Hesab - kitab dəftəriniz var? 

- Mən hər gün özümə hesab verirəm.

Təbliğ etdiyiniz gerçəklər hansılardı, necə düşünürsünüz sevginin təbliğata ehtiyacı varmı? 

- Sevgi ana bətnində yaranır. Təbliğata ehtiyacı yoxdur.

Yaşamaq və  var  olmaq arasında fərq nədir?

- İgid bir dəfə ölər, namərd isə gündə yüz dəfə.