Azərbaycanda səfərdə olan Türkiyə Milliyyətçi Həkimlər Dərnəyinin üzvləri Ermənistanın Tovuz rayonu istiqamətində törətdiyi son təxribatlar nəticəsində şəhid olmuş general-mayor Polad Həşimovun ailəsini ziyarət ediblər.
Türkiyə Milliyyətçi Həkimlər Dərnəyinin sədr müavini Həsən Yavuzhan Baş və dərnəyin üzvü Xalid Gökalp Küçüyü Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənli müşayiət edib.
Türkiyəli həkimlər şəhid anası Səmayə Həşimovaya və ailə üzvlərinə dərin hüznlə başsağlığı verib, şəhidlərimizə Allahdan rəhmət diləyiblər, şəhid anasına türk bayrağı hədiyyə ediblər. Şəhid anası bayrağı qəbul edərək öz ehtiramını bildirib.
Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənli hər zaman Azərbaycan hərb həkimləri ilə bərabər savaşlarda olmağa hazır olduqlarını bildirib: "Əsgər kimi vuruşmağa hazırdırlar. Azərbaycanı öz vətənləri hesab edirlər. Ulu öndər, ümummilli lider Heydər Əliyevin "Bir millət, iki dövlət” ideyalarına sadiqdirlər”.
Milliyyətçi Həkimlər Dərnəyinin sədr müavini Həsən Yavuzhan Baş Polad Həşimovun vətəni üçün etdiklərini yüksək qiymətləndirib: "Polad şəhidimizin ailəsini ziyarət etdik. Komandirimizin şəhadətə yüksəlməsinə qədər olan müddətdə vətən üçün, bayraq üçün, torpaq üçün, türk birliyi üçün, türk dövləti üçün etdiyi mücadilələri, bu günə aldığı təhsilin necə bir şəkildə vətənin müdafiəsi üçün istifadə etdiyinə şahid olduq. Çox qeyrətli, vətənpərvər ailəsi ilə tanış olduq. Anası il, bacısı ilə və qardaşı ilə. Onları dinlədik, onları dərdləri ilə dərdləndik. Kiçik bir hədiyyəmizlə gəldik. Şəhid ailəsinə edə biləcəyimiz ən böyük hədiyyə şəhidimizn uğrunda canını verdiyi bayrağıdır. Türkiyə Cümhuriyyətinin bayrağını hədiyyə etdik”.
Həkim Xalid Gökalp Küçük isə Azərbaycan-Türkiyə qardaşlığı üçün əllərindən gələni etməhə hazır olduqlarını deyir: "Biz hər zaman şəhidlərimizi dua ilə yad edirik. Məkanları cənnət olsun. Həmişə Azərbaycan-Türk qardaşlığı üçün də hər zaman əlimdən nə gəlirsə, etməyə çalışırıq. Şəhid olmaq lazım gəlirsə də, sevə-sevə canımızı şəhid olaraq veririk. Bu barədə Azərbaycan-Türkiyə qardaşlığı həmişə yaşasın. Hər zaman iki dövlət-bir millət olaraq yolumuza davam edəcəyik”.
Türkiyəli həkimlər səfər çərçivəsində digər şəhid ailələrini də ziyarət edəcək, döyüş bölgələrində və hərbi hissələrdə olacaq, Qurban bayramı münasibətilə Tovuz rayonunun Ağdam kəndində əhali ilə görüşəcəklər.
Xəbərdən istifadə edərkən istinad etmək vacibdir.