"Pandemiya şəraitindən istifadə edən bəzi sakinlər Xəzər bağları adlanan ərazidə dəniz kənarına yaxın sahələri qanunsuz olaraq zəbt edərək, hasara alıblar. Sumqayıt şəhər bələdiyyəsi qanunsuz olaraq hasarlanmış əraziləri sökərək, qanun çərçivəsində torpaq sahələrini boşaldıb".
Bu barədə Xeberle.com-a açıqlamasında Sumqayıt şəhər Bələdiyyəsinin sədri Sultan Əsədov deyib. S. Əsədov bildirib ki, qanunsuz olaraq hasarlanmış ərazilər Sumqayıt şəhər bələdiyyəsi işçiləri tərəfindən daim nəzarətdə olub: "Lakin vətəndaşlar işçilərə hədə-qorxu gələrək öz qanunsuz əməllərini həyata keçirməyə nail olublar. Xüsusi karantin rejimi dövründə bələdiyyə bütün tədbirlərini dayandırdığı üçün, heç bir söküntü işi apara bilmədik. Artıq öz işimizə davam edə bildiyimizə görə, qanunsuz olaraq tutulmuş ərazilərin söküntüsü işini həyata keçirdik. Ərazi boş torpaq sahələri olub, yaşayış massivi deyil. Bəzi vətəndaşlar dənizkənarı 2 hektar ərazini mövcud şəraitdən istifadə edib hasarlayıblar. Söküntü edilən zaman vətəndaşların heç birini aşkar edib, qanun qarşısında cavab vermələrini təmin edə bilməsək də, aidiyyatı orqanlar tərəfindən araşdırma aparılır. Vətəndaşlar qanunsuz əməllərinə görə qanunla nəzərdə tutulmuş qaydada cavab verəcəklər".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
