Diqqətli olun!

Hər il olduğu kimi bu il də Yeni il qabağı Bakının əksər ticarət mərkəzlərində müxtəlif oyuncaqlar, hədiyyələr, maskalar və kostyumlar satışa çıxarılıb.

Göz oxşayan müxtəlif ölkə istehsalı olan malların arasında Çin istehsalı olan mallar üstünlük təşkil edir. Alıcılar nisbətən ucuz olan Çin məhsullarını alıb övladlarına Yeni il sevinci yaşatmaq istəyirlər. Lakin Çin istehsalı olan keyfiyyətsiz oyuncaqlar bu sevinci sağlamlığa ciddi ziyana çevirə bilər. Yeni illə bağlı alış-verişə çıxan istehlakçılar çox diqqətli olmalıdırlar.

Azad İstehlakçılar Birliyinin sədri Eyyub Hüseynov bildirib ki, daxili bazarda Çinlə yanaşı digər ölkələrin də istehsalı olan yeni il oyuncaqları satılır.

"Keyfiyyətli Çin məhsulları da var. Məhsulun Çində istehsal olunması heç də onun keyfiyyətinin pis olması demək deyil. Lakin istənilən halda satışda olan bütün məhsulların gigiyenik sertifikatı var”, deyə o bildirib.

Eyyub Hüseynov istehlakçıları mal alarkən diqqətli olmağa çağırıb.

"Qanuna əsasən, istehlakçı almaq istədiyi hər bir məhsula görə gigiyenik sertfikatı tələb edə bilər”, deyə o bildirib.

Ekspertin sözlərinə görə, hər bir alıcı satılan oyuncağın keyfiyyətli və sağlamlığa ziyanlı olub olmamasını özü də müəyyən edə bilər.

"Oyuncaqdan pis qoxu gəlirsə, alıcı onu almamalıdır. Alıcı həmçinin isladılmış ağ tənzifi oyuncağa sürtüb onun rənginin tənzifə çıxıb çıxmadığını müəyyən edə bilər. Əgər oyuncağın rəngi tənzifə çıxırsa, deməli həmin oyuncağı almaq olmaz,” - Eyyub Hüseynov məsləhət edib.  (oxu.az)