Dekabrın 24-də Azərbaycan prezidenti İlham Əliyev doğum gününü qeyd etdi.
Hər ilin bu günü ölkə başçısının şərəfinə ayrı-ayrı təşkilatlar, icra orqanları tərəfindən müxtəlif tədbirlər, dəbdəbəli mərasimlər keçirilsə də, bu il buna rast gəlinmədi. Amma bu məsələdə ən çox Sumqayıtın icra başçısı Eldar Əzizov fərqlənirdi. O, hələ Gəncənin icra başçısı olduğu zamanlardan bir ənənənin əsasını qoymuşdu: hər il 24 dekabr günü böyük tort hazırlatdırırdı. Prezidentin yaşı nə qədərdirsə o uzunluqda tort bişirtdirirdi. Ötən ilə qədər bu ənənə davam etdu. Amma bu il nədənsə Sumqayıtda tort mərasimi keçirilmədi.
Eldar Əzizovun prezident İlham Əliyevin doğum gününü xüsusi qeyd etmə ənənəsinə bu dəfə sadiq qalmaması insanlarda sual doğurdu. "Qafqazinfo" xəbər verir ki, "Yeni Müsavat” qəzeti bu məsələyə aydınlıq gətirmək üçün Sumqayıt ŞİH ictimai-siyasi təşkilatlarla iş şöbəsinin müdiri Seyfəddin Rəhimovla əlaqə saxlayıb.
S.Rəhimov təsdiqləyib ki, bu il ölkə başçısının doğum günü ilə bağlı Sumqayıt şəhərində heç bir tədbir keçirilməyib: "Bu il niyə tort bişirilmədi sualına cavab vermək mənim səlahiyyətimdə olan bir məsələ deyil. Bir il tort hazırlanıbsa o demək deyil ki, hər il olmalıdır. Olmaya da bilər. Bu, hökumətin qərarıdır. Ötən gün Sumqayıt şəhərində heç bir tədbir keçirilməyib”.
Qeyd edək ki, bu il ölkə başçısının doğum günü Yeni Azərbaycan Partiyasında da xüsusi tədbirlərlə yadda qalmadı. YAP icra katibinin müavini, deputat Siyavuş Novruzov bildirdi ki, prezident doğum günlərini daha çox sadə insanlarla keçirməyə üstünlük verir: "Hər kəs özünün bildiyi formada bu günü qeyd edir. YAP həmin günü "2004-2014 onillik Azərbaycan iqtisadi inkişafı” adlı elmi konfrans keçirdi. Başqa bir yerdə başqa formada tədbirlər keçirilir. Ölkə başçısı hər il ad gününü sadə insanlarla keçirir. Ötən il məcburi köçkünlərlə keçirmişdi. Dünən doğum günündə böyük bir məscidin açılışında iştirak etdi. Prezident daim xalqla bir yerdə olmağa üstünlük verir. Kimin ürəyi necə istəyirsə o cür də keçirir”.
Ola bilsin ki, hakimiyyət bu cür təbliğat kampaniyalarından imtina etmək qərarı verib. Çünki, məhz Eldar Əziziovun tort mərasimləri xeyli ictimai qınağa, tənqidə məruz qalırdı.
Qeyd edək ki, ölkə başçısı dəfələrlə dəbdəbəli ad günü, toy məclislərinin yığışdırılması ilə bağlı məmurlara xəbərdarlıq edib. İ.Əliyev müşavirələrdə dəfələrlə deyib ki, öz doğum gününü sadə şəkildə, ailə üzvləri ilə qeyd etməsi ilk növbədə onun təbiətindən irəli gəlir. İkinci səbəb kimi isə bunu nazirlərə, digər yüksək rütbəli məmurlara nümunə kimi göstərdiyini bildirib. (qafqazinfo.az)
Xəbərdən istifadə edərkən istinad etmək vacibdir.
