Azərbaycan Respublikasının Prezidenti yanında Gənclər Fondunun maliyyə dəstəyi ilə Gənc Politoloqlar Mərkəzinin (GPM) və Odlar Yurdu Universitetinin birgə təşkilatçılığı ilə sözügedən təhsil ocağının akt zalında "Gənc tədqiqatçıların elmi potensiallarının artırılması” layihəsi çərçivəsində yekun elmi-praktik konfrans təşkil olunub. 24 dekabr 2014-cü il tarixində baş tutan tədbirə bir çox rəsmi şəxslər, elm adamları, tanınmış ictimaiyyət nümayəndələri qatılıblar.

Azərbaycan Respublikasının Dövlət Himninin səsləndirilməsindən sonra konfransı giriş sözü ilə Odlar Yurdu Universitetinin rektoru, professor, Milli Məclisin deputatı Əhməd Vəliyev açıb. O, gənc tədqiqatçılara elm və təhsilin faydaları haqqında danışıb. Rektor qeyd edib ki, bütün elmlər yalnız insan həyatının rifah halının yaxşılaşdırılmasına, təfəkkürün inkişafına yönəlməlidir. Elə olarsa, elmin inkişafı cəmiyyətin ən başlıca vəzifəsi kimi dərk olunacaq: "Əziz gənc tədqiqatçılar, biz yaxşı dərk etməliyik ki, cəmiyyətin, ölkənin, dövlətin, ailənin, fərdin, yaşaması, inkişaf etməsi elmdən kənar heç nəyə bağlanmır. Dövlətimiz, cəmiyyətimiz elmi elmin naminə deyil, həm də özünə görə inkişaf etdirməkdə maraqlıdır. "Elm elm üçündür” anlayışı nə qədər cazibədar və ya nə qədər fövqəlbəşər səslənsə də, əslində dolayısı yolla da olsa, yenə elm yalnız insan həyatına xidmət edir. Elmin inkişafı birinci növbədə onun öyrənilməsindən və ötürülməsindən asılıdır. Elm unudulmasın deyə mütləq paylaşılmalı, yeni nəslə ötürülməlidir. Yeni nəsil ona hökmən öz əlavələrini edəcək, onu cilalayacaq və deməli, inkişaf etdirəcək”, – deyə Ə.Vəliyev söyləyib.
Professor Əhməd Vəliyev 1995-ci ildə Odlar Yurdu Universitetinin ulu öndərimizin təşəbbüsü ilə yarandığını qeyd edib və söyləyib ki, universitet yarandığı gündən burada elmə xüsusi bir diqqət, yanaşma mövcud olub.
"Biz müşahidə etmişik ki, hazırda universitet daxilində elmə, elmi tədqiqatlara maraq artıb. Əvvəllər bizdə 2-3 diktorant, dissertant olurdusa, hazırda onların sayı 2-3 dəfə artıb. Biz Odlar Yurdu Universiteti nəzdində Biznes, Karyera, Təlim və Marketinq İnnovasiyaları İnstitutu təsis etmişik ki, burada fəaliyyət göstərən mütəxəssislər gənclərimizə bakalavr pilləsini bitirdikdən sonra karyera qurmağa, hansı fəaliyyət sferasını seçməyi ilə bağlı dəstək, yardım və tövsiyələr verir. Sevindirici haldır ki, elmə maraq göstərənlərin sayı əvvəlki illərlə müqayisədə artan istiqamətdə gedir”, - deyə o fikrinə davam edib.
Rektor əlavə edib ki, bu gün də cənab İlham Əliyev ümummilli liderin layiqli davamçısı kimi Azərbaycan Respublikasının müstəqilliyini qoruyub saxlanılması, respublikamızın bütün dünyaya tanıdılması istiqamətində səmərəli fəaliyyət göstərir. Həmçinin, İlham Əliyev cənabları ölkəmizin hərtərəfli, o cümlədən elm, təhsil sahəsində inkişafı ilə bağlı mühüm əhəmiyyətli sərəncamlar və fərmanlar verir. Biz də onun imzaladığı sərəncamlara əsaslanaraq universitetimizdə gənclərin təhsilli, elmli, layiqli vətənpərvər kimi yetişməsi üçün əzmlə çalışırıq.
Çıxışının sonunda Əhməd Vəliyevdən başlayaraq digər rəsmi şəxslər də GPM-in "Gənc tədqiqatçılarının elmi potensiallarının artırılması” layihəsində fəallıq nümayiş etdirən bir qrup gəncə təşkilatın xüsusi Sertifikatlarını təqdim edib.

Ardınca Azərbaycan Respublikasının Prezidenti Administrasiyasının İctimai-siyasi məsələlər şöbəsinin sektor müdiri, siyasi elmlər üzrə fəlsəfə doktoru, YAP Siyasi şurasının üzvü Qafar Əliyev çıxış edib. Adminstrasiya məsulu Qafar Əliyev çıxışında Azərbaycan elminin inkişafına göstərilən dövlət qayğısından danışaraq, ölkədə elmin gələcək inkişaf perspektivləri, yeni potensial elm sahələri barədə fikirlərini bölüşüb. Prezident İlham Əliyevin uğurlu gənclər siyasətinə də toxunan Q.Əliyev qeyd edib ki, bu gün Azərbaycanda gənclər siyasəti dövlət siyasətinin mühüm tərkib hissəsidir: "Azərbaycan gəncliyi ictimai həyatın bütün sferalarında aktiv fəaliyyəti ilə seçilir və siyasi, elmi, iqtisadi, humanitar, sosial tədbirlərin həyata keçirilməsində mühüm rol oynayır. Dövlətin gənclərin fəaliyyəti üçün yaratdığı geniş imkanlar nəticəsində bu təbəqə cəmiyyətin aparıcı qüvvəsinə çevrilib”.
Qafar Əliyev ümummilli lider Heydər Əliyevin elm və təhsil sahəsinə daim böyük diqqət və qayğı göstərdiyini xatırladıb, dahi rəhbərin siyasətinin onun ən layiqli davamçısı, Azərbaycan Prezidenti İlham Əliyev tərəfindən əzmlə davam etdirildiyini bildirib. O, Azərbaycan dövlətinin elm və təhsilə ayırdığı diqqət və qayğıdan, Elmin İnkişafı Fondundan, Bilik Fondundan söz açaraq bildirib ki, hazırda elmin, təhsilin inkişafına çox münbit zəmin var: "Dövlət büdcəsindən hər il elm və təhsilə milyonlarala manat vəsait ayrılır. Lakin ölkədə elmi təfəkkür heç də təkcə dövlət nəzarəti altında olan strukturlarda formalaşmır. Bundan ötrü müxtəlif elmi cəmiyyətlər, qurumlar, QHT-lər yaradılır. Sual verirəm, ölkəmizdə qeyri-hökumət xarakterli neçə belə elmi birlik, təşkilat var? Bu çox yaxşı haldır ki, Gənc Politoloqlar Mərkəzi adına, fəaliyyətinə görə siyasi biliklərə meyilli olan QHT-dir, amma təqdirəlayiq haldır ki, sırf elmlə bağlı layihə götürüb və icra edib. Mən həmişə qeyd etmişəm ki, elm olmayan yerdə inkişaf da olmayacaq, ixtisaslı kadrlar da. Bir daha qeyd edək ki, elmə yol təhsildən keçir. Qeyd edim ki, Azərbaycan Respublikasının Prezidenti cənab İlham Əliyevin sərəncamları, Heydər Əliyev Fondunun təşkilatçılığı ilə son illərdə ölkəmizdə 800-dək məktəb tikilib, yaxud əsaslı şəkildə təmir edilib, ən son avadanlıqlarla təmin edilib. Və onların müəyyən hissəsi də regioanlarımızdadır. Bu yaxınlarda regianlardakı orta məktəblərdə ezamiyyətdə oldum. Amma orda müəyyən təzadlarla üzləşdim. Hər cür şərait olsa da, həmin şəraitə müvafiq yüksək təhsil yoxdur”.
Qafar Əliyev söyləyib ki, elm sahələrinə, ixtisaslara olan maraq daim dəyişir və inkişaf edir: Tutalım 30 il öncə əksər ailələr oğul övladlarının hüquqşünaslıq ixtisasında təhsil almalarını, qız övladlarının isə həkim olmalarını arzu edirdilər. Amma dövr, standartlar dəyişir, eyni zamanda bu seçimlərdə dəyişikliklər olur. Gəlin razılaşaq ki, hazırda əksər gənclər məhz hüquq ixtisasında təhsil almağı düşünmürlər, indi fərqli seçimlər edirlər”.
Qafar Əliyev söyləyib ki, elmi inkişaf etdirməli, elm isə cəmiyyət həyatını irəli aparmalıdır! Lakin cəmiyyət də öz-özünə idarə edilmir. Onun da başında dövlət durur. Deməli, dövlət elmin inkişafına birbaşa məsuldur. Əksər dövlətlər elmə ciddi diqqət göstərir və buna görə ölkədə təhsilə diqqəti artırır. Ölkəmiz də hazırda bu yolla gedir. Bizim əsas elm mərkəzimiz - Azərbaycan Milli Elmlər Akademiyası adlanmır. Sizi inandırım ki, hər dövlətdə Elmlər Akademiyası mövcud deyil, bu da dövlətimizin elmə diqqətinin göstəricisidir. Məsələn, Yaponiya və ya İsrail kimi böyük olmayan ölkələrin demək olar ki, təbii sərvətləri yoxdur, onlar öz elmləri ilə dünyada məşhurdurlar. Onlar dünya elminə də böyük töhvələr verərək, öz cəmiyyətində də aparıcı mövqedədirlər. Bu gün biz dünyaya Nəsrəddin Tusi, Yusif Məmmədəliyev, Azad Mirzəcanzadə, Lütfizadə və sair kimi alimlər bəxş etmişik. Bu, bizim də bizim elmi potensialımız çox güclüdür.
Q.Əliyev şad olduğunu bildirib ki, bütün çətinliklərə baxmayaraq, son vaxtlar gənclərin elmi sahələrdə aktivlik nümayiş etdirirlər. PA rəsmisinin sözlərinə görə, belə tədbirlərin keçirilməsində əsas məqsəd gənclərin gələcək həyatlarında mühüm rol oynayacaq ixtisas və peşə seçimlərinin düzgün edilməsinə yardımçı olmaqdır. Qafar Əliyev dövlətimizin ən ümdə məqsədlərdən birinin də müasir gənclərin elmə olan marağının artırılması məsələsində gəncləri elmi fəaliyyətə cəlb etmək, onların ictimai və elmi-tədqiqat fəaliyyətinə marağının artırılmasına xidmət etməkdən ibarət olduğunu deyib.
Sonra söz Azərbaycan Respublikasının Prezidenti yanında Gənclər Fondunun sektor müdiri Orxan Ərəbova verilib. Sektor müdiri Orxan Ərəbov Azərbaycan Gənclər Fondunun maliyyə dəstəyi ilə elmi mövzularda belə elmi konfransların keçirilməsinin çox əhəmiyyətli olduğunu bildirərək Gənclər Fondunun fəaliyyəti ilə bağlı qısa məlumat verib, fondun bir neçə gün öncə 3 yaşının tamam olduğunu söyləyib. Fondun məsulu qeyd edib ki, 2011-ci il dekabrın 19-da Azərbaycan Prezidenti İlham Əliyevin təşəbbüsü ilə Gənclər Fondu yaradılıb və 3 il ərzində fond tərəfindən 6 qrant müsabiqəsi keçirilib. Fond elektron müraciət sistemi yaratmaqla gənclərin bu qurumla əməkdaşlığını daha da asanlaşdırıb. Müsabiqələr çərçivəsində icra edilmiş və qalib olmuş layihələr bütün bölgələri əhatə edir. Gənclər, həmçinin xarici ölkələrdə keçirilən təlimlərə, seminarlara və digər tədbirlərə qatılmaq imkanı qazanıblar. O.Ərəbov əlavə edib ki, Gənclər Fondu ölkəmizdə ilk dəfə olaraq layihələrin internet vasitəsilə qəbuluna başlayıb. Nəticədə ilk qrant müsabiqəsinə 165 layihə daxil olmuşdusa, sonuncu - 6-cı müsabiqəyə 1249 layihə təqdim edilib. Fond gələcəkdə müxtəlif telekanallarda intellektual, gənclik və idman, ixtiraçılığın inkişafına dəstək layihələri də həyata keçirəcək. Hazırda Fondda 304 gənclər təşkilatı və 3842 gənc qeydiyyatdan keçib.
O.Ərəbov Gənclər Fondunun qısa bir müddət ərzində bir sıra əhəmiyyətli məsələləri həll etdiyini bildirərək, fondun yerli və regional layihələrlə yanaşı, bir sıra beynəlxalq layihələri də maliyyələşdirdiyini, beynəlxalq layihələrdə tərəfdaş qismində çıxış etdiyini və gənclərin, xüsusilə, elmi tədqiqatlarına dəstək verdiklərini bildirib.

Gənc Politoloqlar Mərkəzinin sədr müavini, Xeberle.com portalının baş redaktoru, AMEA-nın Fəlsəfə, Sosiologiya və Hüquq İnstitutunun doktorantı Elnur Ağayev "Gənc tədqiqatçıların elmi potensiallarının artırılması” layihəsinin məqsədi, görülən işlər, nəticələr və layihə çərçivəsində gələcək planlar haqqında danışıb. O qeyd edib ki, adıçəkilən layihə müxtəlif elm sahələri üzrə elmi tədqiqatlar aparan gənc magistr, dissertant, dokotorantlar, gənc alimlər və ümumiyyətlə elmi tədqiqata meyilli olan potensial gənc tədqiqatçılara müasir, mütərəqqi tədqiqat metodlarının öyrədilməsi və təcrübədə tətbiq edilməsinin təmin edilməsi, təcrübə mübadiləsi məqsədi ilə həyata keçirilir. İcrasına noyabr ayından başlanılan layihə çərçivəsində hər həftə Odlar Yurdu Universitetinin kiçik akt zalında peşəkar mütəxəssislər tərəfindən elm tədqiqatların metod və vasitələri, elmi tədqaqatçıların potensialının artırılması yolları, onlar qarşısında duran problem və çətinliklər, ənənəvi və yeni elm sahələri, sosial araşdırma, sorğu və statistika, elmin yeni inkişaf meyilləri və sair kimi mövzular üzrə təlimlər keçirilib. Təlimlərin ikinci hissəsində isə müasir dünyada baş verən proseslərlə, xüsusən ölkəmizlə bağlı aktual siyasi, sosial, iqtisadi problemlərə, məsələlərə toxunulub, "Dağlıq Qarabağ münaqişəsi”, "Azərbaycanın Neft-qaz strategiyası”, "Azərbaycanda elm və təhsilə dövlət qayğısı”, "Azərbaycanın geostrateji siyasəti”, "Ölkəmizin beynəlxalq təşkilatlardakı fəaliyyəti” və sair mövzular üzrə seminar məşğlələr keçirilib. Həmin təlimlərin bu özəlliyi ilə fərqlənib ki, əksəriyyəti diskussiya və qaynar müzakirələr şəraitində keçib. O, layihə çərçivəsində gənclərin elmə marağının müəyyənləşdirilməsi yönündə GPM tərəfindən keçirilən sosioloji anket sorğusu haqqında da da söz açıb və bildirib ki, bu sorğu gənclərin elmə olan marağı haqqında müəyyən təəssürat yaradıb.
E.Ağayev deyib ki, layihə çərçivəsində 50-dək gənc tədqiqatçı aktiv iştirak edib və layihədən bundan faydalanıb. Nəticədə 1 doktorantın elmi mövzusunun adında dəyişiklik edilib, 4 magistrə gələcək elmi tədqiqat işinin mövzusunun müəyyənləşdirilməsində tövsiyə xarakterli yardım göstərilib, xeyli tələbədə isə elmə maraq yaradılıb.
Sonda Elnur Ağayev Gənc Politoloqlar Mərkəzi adından dəstəyə görə Gənclər Fondunun rəhbərliyinə, göstərdikləri köməyə görə Odlar Yurdu Universitetinin rektoru Əhməd Vəliyevə və PA-nın məsulu Qafar Əliyevə öz minnətdarlığını bildirib.

Sonra məruzələr başlayıb. İlk məruzə ilə Siyasi elmlər doktoru, professor, Azərbaycan Respublikası Prezidenti Yanında Dövlət İdarəçilik Akademiyası nəzdində Siyasi Araşdırmalar İnstitunun direktoru, YAP-ın Beynəlxalq əlaqələr komissiyasının katibi Elman Nəsirov çıxış edib. O, "Dağlıq Qarabağ münaqişəsinin həllinə elmi-analitik yanaşma” mövzusunda olan məruzəsində problemin hazırkı durumuna toxunub, beynəlxalq aləmdə, müxtəlif təşkilatlar tərəfindən Qarabağ konfliktinə olan yanaşmalardan, standartlardan söz açıb: "Qarabağ probleminin həlli dövlətimizin siyasətinin əsas məsələsidir. Həm Qərbin, həm də Rusiyanın özünün geostrateji maraqları var. Təbii ki, bu da müqaqişənin həll olunmamasında öz sözünü deyir. Qərbin Moldovada «Dnestryanı Respublika», Gürcüstanda Abxaziya və Cənubi Osetiya münaqişələrinin həll edilməsi ilə bağlı mövqeyi bəllidir. Qərb Moldova və Gürcüstanın əraziləri ilə bağlı münaqişələri Rusiyanın geopolitik ambisiyalarının nəticəsi hesab edir”. Dünya gücləri tərəfindən Ermənistan-Azərbaycan, Dağlıq Qarabağ münaqişəsinin həllinə olan cəhdlər demək olar ki, aktiv və davamlı deyil. Onun sözlərinə görə, Dağlıq Qarabağ münaqişəsinin həll edilməsində Qərb və Rusiya daha çox ortaq mövqedən çıxış edirlər və ortada ciddi bir nailiyyət yoxdur. Təbii ki, Ermənistan hakimiyyətinin də bu münaqişənin uzadılmasında xüsusi canfəşanlığı var. Azərbaycan və Ermənistan tərəflərinin hər bir görüşü öncəsi və görüşündə də müəyyən ümidlər bağlanır, taktiki olsa da, nə isə irəliləyişin olacağına kövrək ehtimal yaranır. Amma təəssüf ki, Ermənistanın tutduğu qeyri-konstruktiv mövqe ucbatından hələlik heç bir nəticə hasil olunmur.
Əslində beynəlxalq təşkilatlar münaqişələrin nizamlanmasını beynəlxalq hüququn norma və prinsipləri çərçivəsində aparmalıdırlar. Bu halda əsas olaraq dövlətlərin suverenliyi, ərazi bütövlüyünün qorunması və millətlərin öz müqəddəratını müəyyənetmə hüququna malik olması prinsiplərinin təmin olunmasına üstünlük verilir. Münaqişələrin tənzimlənməsində beynəlxalq təşkilatlar, xüsusilə də BMT və onun Təhlükəsizlik Şurası böyük səylər göstərsələr də çox vaxt bu səylər effektsiz olur. Qarabağ problemi ilə bağlı BMT Təhlükəsizlik Şurası tərəfindən 1993-cü ildə 4 qətnamə saylı (822, 853, 874 və 884) qəbul olundusa da, bu qətnamələrin hər birində ermənilərin təcavüzkar siyasəti pislənilsə də və erməni hərbi birləşmələrinin zəbt etdikləri Azərbaycan torpaqlarından qeyd-şərtsiz çıxmaları birmənalı şəkildə tələb olundusa da, bu tələblər indiyə qədər də yerinə yetirilməyib. O qeyd edib ki, dünyanın bir çox təşkilat və dövlətlərindən Azərbaycana, onun ən ağrılı problemi olan Qarabağ münaqişəsinə qarşı ikili standartlar mövcuddur. Və təəssüf hissi ilə əlavə edib ki, artıq ikili standartlar vahid standartlar şəklində formalaşıb. Ona görə də cənab Prezident İlham Əliyev demişkən, biz güclənməli, güclənməli, yenə də güclənməliyik, qüdrətimizi bütün dünyaya bəyan etməliyik. Biz güclü olduqda qarşı tərəfə də diqtəmizi, prinsiplərimizi daha asan göstərə biləcəyik.

Növbəti məruzə ilə "Olaylar” İnformasiya Agentliyinin baş direktoru, publisist, tarixçi, türkoloq və daha çox tarixi romanlar müəllifi kimi tanınan yazıçı Yunus Oğuz çıxış edib. O, elmin müxtəlif sahələrinin inteqrasiyası problmlərinə,o cümlədən dəqiq və hümanitar elmlərin qarşılıqlı əlaqəsi məsələsinə toxunub, öz yaradıcılıq inkişafını -fiziki,emosional və intelektual qabiliyyətlərini səfərbər etməklə çətinlik çəkən tələbələrə və gələcək alimlərə gərəkli məsləhətlər verib. O, Azərbaycan tarixinin, ədəbiyyatının hər bir gənc tədqiqatçı tərəfindən mükəmməl bilməli olduğunu vurğulayıb və onların səylə, iradə ilə, səbrlə irəliləməsinin vacibliyini vurğulayıb. Y.Oğuz qeyd edib ki, gənc alimlərin elmdə inkişafı, dövlət tərəfindən onların müxtəlif sosial problemlərinin həlli mühüm məsələdir. Elm adamlarının gəncləşdirilməsi, yaşlıların təcrübəsini gənclərlə bölüşməsinin vacibliyinə toxunub. Gənc alimlərin məvaciblərinin artırılması hazırda vacib məsələlərdəndir. Bundan yalnız elmimiz qazanacaq. Amma alimlərimiz də boş oturmamalıdırlar, ələlxüsus gənc alimlər inkişaf etmək üçün fondların keçirdiyi qrant və layihələrdə iştirak etməklə də əlavə gəlirlər əldə edə bilərlər.
Azərbaycan Respublikası Kənd Təsərrüffatı Nazirliyinin şöbə müdiri vəzifəsində işləmiş, Azərbaycan Respublikası Prezidenti yanında Dövlət İdarəçilik Akademiyasının məzunu, elmi tədqiqatçı Rəşid Abbasov Azərbaycanda elm və təhsilin inkişafına dövlət qayğısından, ümummili lider Heydər Əliyevin Azərbaycan Respublikasında elm və təhsilin inkişafında rolundan, həmçinin, kənd təsərrüfatı elminin inkişafında son dövrlər əldə edilən nailiyyətlərdən bəhs etdi. Natiq bir çox faktlar əsasında Azərbaycanda elm və təhsilin inkişafında əldə edilən son uğurları, həmçinin bu sahədə olan perspektivləri qeyd etdi və gənc tədqiqatçılara həmin sahə üzrə elmi tədqiqata həvəsləndirilməsi üçün müxtəlif tövsiyələr verdi.
İqtisad elmləri üzrə fəlsəfə doktoru, Odlar Yurdu Universiteti nəzdində Biznes, Karyera, Təlim və Marketinq İnnovasiyaları İnstitutunun direktoru Əlizadə Namiq Gənc tədqiqatçıların elmi tədqiqat zamanı qarşılaşdığı çətinliklər və onun həlli yollarından danışıb. Gənc alim xüsusən dil, ədəbiyyat, elmi-tədqiqat yerlərinin kasadlığı, nümunə və presidentlərin, həmçinin elektron materialın azlığı, maliyyə çətinliyi və sair kimi problemlərdən geniş söz açıb.
Sonrakı məruzəni Odlar Yurdu Universitetinin müəllimi, BDU-nun doktorantı, Eldar Cəfərov edib. "Mərkəzi Asiyada geosiyasi mübarizə və onun nəticələri” mövzusunda olan məruzə həm də monitor vasitəsiylə slaydlar şəklində göstərilib.
Hüquq elmləri üzrə fəlsəfə doktoru OYU-nun müəllimi Səbuhi Əliyev "Qərb ölkələrində Bank fəaliyyəti əlehinə törədilən cinayətlərlə mübarizənin cinayət-hüquqi aspektləri” adlı məruzə ilə çıxış edib.
Sonra konfrans öz işini bölmələr üzrə davam etdirib.

Xatırladaq ki, Gənc Politoloqlar Mərkəzi tərəfindən təşkil olunan "Gənc Tədqiqatçıların Elmi Potensiallarının Artırılması” (GTEPA) adlı layihə müxtəlif elm sahələri üzrə elmi tədqiqatlar aparan magistr, dissertant və dokotorantlar, gənc alimlər və ümumiyyətlə elmi tədqiqata meyilli olan potensial gənc tədqiqatçılara müasir interdisplinar tədqiqat metodlarının öyrədilməsi və təcrübədə tətbiq edilməsinin təmin edilməsi məqsədi ilə həyata keçirilirdi. Layihədən ümumilikdə 50 gənc elmi tədqiqatçı faydalanıb. Layihə boyunca fəal iştirak edən, kursu müvəffəqiyyətlə başa vuran gənc tədqiqatçılarla layihədən sonrakı müddət ərzində də seminar-diskussiyaların keçirilməsi nəzərdə tutulur.

Elnur Ağayev
Cavanşır Qədimov
Xeberle.com