Mənə şəhər verin
Bir zamanlar Eyyub Yaqubovun "Mənə dəniz verin” mahnısı çox dəbdə idi. Təəssüf ki, kimsə ona normal və arzuladığı dənizi verə bilmədi. Çünki sahib
olduğumuz vur-tut bircə Xəzər dənizimiz var ki, o da nə gündədir, Allah da bilir, elə bəndələr də. Eyyub Yaqubovdan fərqli olaraq mən şəhər istəyirəm. Heyf ki, mahnı bəstələyə bilmədim, lakin köşə "bəstələ”dim. Adı da "Mənə şəhər verin”.
Hansı şəhər? Səbirli oxucu olub oxusanız bilərsiniz.
Mənə şəhər verin... elə bir şəhər ki, hər küçəsi sökülsün, tikilsin və yenə də
sökülsün və yenə və yenə...
Mənə şəhər verin... elə bir şəhər ki, yolları qazılsın, yenidən çəkilsin və yenə də
qazılsın və yenə və yenə...
Mənə şəhər verin... elə bir şəhər ki, yağış yağanda Venesiyaya bənzəsin, qar
yağanda isə Sibiri xatırlatsın.
Mənə şəhər verin... elə bir şəhər ki, yaz-payız aylarında qayıqla üzə, qışda xizəklə
sürüşə bilim.
Mənə şəhər verin... elə bir şəhər ki, addımbaşı insanlara şəfa əvəzinə cəfa verən
apteki olsun.
Mənə şəhər verin... elə bir şəhər ki, hər beş obyektindən biri şadlıq evi və çayxana,
biri telefon dükanı və gözəllik salonu, biri market olsun (yerdə qalan ikisin də sizi
təyin edin).
Mənə şəhər verin... elə bir şəhər ki, hər yüz min nəfərinə bir kitab evi düşməsin.
Mənə şəhər verin... elə bir şəhər ki, sakinlərinin tıxaca qarşı immuniteti olsun və
onu həyatının ayrılmaz parçası hesab etsin.
Mənə şəhər verin... elə bir şəhər ki, ağaclarını rahat və qorxu-hürküsüz kəsib doğrayıb
yerində obyekt tikə bilim.
Mənə şəhər verin... elə bir şəhər ki, sahilində olduğu dənizinin qumsallıqlarını
"Çimmək qadağandır” lövhələri bəzəsin.
Mənə şəhər verin... elə bir şəhər ki, bardürlərinə qalxa bilməyim, qazonlarında
avropalı kimi oturub kitab oxumayım.
Mənə şəhər verin... elə bir şəhər ki, əlillər təkbaşına rahat öz arabalarında yolu
keçə və səkilərə qalxa bilməsinlər.
Mənə şəhər verin... elə bir şəhər ki, sakinləri piyada keçidlərindən istifadə etsin,
amma qorxa-qorxa keçsin.
Mənə şəhər verin... elə bir şəhər ki, marşrut avtobusları ən çılğın atraksionlar kimi
insanlara həyəcan versin, adrenalini artırsın.
Bəs sizə necə şəhər lazımdır?
Elvin Babyev
Xeberle.com
Xəbərdən istifadə edərkən istinad etmək vacibdir.
