Xeberle.com həmin məktubu olduğu kimi təqdim edir:

Hörmətli, Vilayət müəllim!

"Əlil Sahibkarlar Təşkilatı” İctimai Birliyinin xətti ilə 2020-ci ildə Regionların İnkişafı İctimai Birliyinin maliyyə -ianə dəstəyi ilə Sosial Məşğulluq Mərkəzi yaradılıb. Bu mərkəzin məqsədi əlilliyi olan şəxslərin əmək bazarına çıxışı üçün peşə hazırlıq səviyyəsinin yüksəldilməsidir. Növbəti dəfə Əlil Sahibkarlar Təşkilatının həyata keçirdiyi bu layihə də uğurla nəticələnib. Təşkilatımız tərəfindən həyata keçirilən çoxsaylı layihələrlə yanaşı, Daxili İşlər Nazirliyinin tabeliyində olan qoşun hissələrində dəfələrlə tərəfimizdən xeyriyyə konsertləri və vətənpərvərlik ruhunun təbliği istiqamətində tədbirləri həyata keçirilmişdir. Eyni zamanda, təşkilatımız tərəfindən DİN-in polis bölmələrində polis mundirini şərəflə daşıyaraq əhalinin asayişi naminə qəhrəmanlıq göstərərək şəhid olmuş polis işçiləri haqqında "İgidlər yurdusan ey Azərbaycan!” klipinin və "Çağır məni” qısametrajlı filmi ərsəyə gətirilib.

Layihənini davamlılığının təmin edilməsi məqsədi ilə alınmış avadanlıqlar Sumqayıt şəhəri, Təzə Katej, Səməd Vurğun küçəsi 5A ünvanında yerləşən təşkilatın hüquqi ünvanında quraşdırılıb.

Təəssüf ki, 2021-ci il may ayının 21-i tarixdə həmin ünvanda baş vermiş oğurluq hadisəsi nəticəsində layihə üçün nəzərdə tutulmuş inventarın böyük bir hissəsi talanmış, yerdə qalan digər avadanlıqlar isə yarasız hala salınıb. Bu barədə Daxili İşlər Nazirliyinin 102 Qaynar Xəttinə məlumat verildikdən sonra operativ şəkildə Sumqayıt şəhər Polis İdarəsinin 4-cü polis bölməsinin əməkdaşları hadisə yerinə gəliblər.

Hadisə yerinə baxış keçirilmiş və təşkilatın sədri Mirzə Məmmədvəliyevdən oğurlanmış əşyalar, dağıdılmış digər inventarlar haqqında məlumat alınıb.

Sevindirici haldır ki, qısa müddət ərzində aparılmış əməliyyat-axtarış tədbirləri nəticəsində hadisəni törətmiş şəxs tutulmuş və oğurlanmış əşyalar alınaraq geri qaytarılmışdır.

Cənab Vilayət Eyvazov!

Sizə və şəxsi heyətinizdə olan nümunəvi xidmətə görə ƏSTİB-in on minlərlə üzvləri, o cümlədən, işğal altında olan torpaqlarımızın azad edilməsi uğrunda gedən döyüşlər zamanı və xidməti borcunu yerinə yetirərkən sağlamlığını itirərək əlil olmuş keçmiş polis işçiləri, müharibə əlili olan qazilərimiz və digər kateqoriyadan olan əlillər adından dərin minnətdarlığımızı bildiririk.

Sumqayıt şəhər Polis İdarəsinin 4-cü polis bölməsinin əməkdaşlarının timsalında təhlükəsizliyimizin, asayişin və hüquqlarımızın keşikçisi olan bütün polis əməkdaşlarına şərəfli və çətin işlərində uğurlar arzu edirəm.