Erməni mətbuatı Gümrü ilə bağlı şok ehtimallar dərc edir.


Naxçıvan ərazisindən İrəvanı cəzalandırmaq üçün 1989-cu ildə edilən hərbi hücum yenidən təkrarlana bilər. 

Bu ehtimal Gümrüdə rus əsgər Valeri Permyakov tərəfindən bir erməni ailəsinin qətl edilməsi ilə bağlı gedən istintaq prosesini şərh edən erməni KİV-ləri tərəfindən yayılıb. 

"Rusiya ekspertləri hətta 1989-cu ildə İrəvanda baş verən hadisələri yada saldılar. Onda Rusiyanın xüsusi bölmələri Azərbaycan ərazisindən İrəvana hücum etdilər və ermənilərin aksiyasını sərt şəkildə yatırdılar. Əgər Gümrüdəki aksiyalar davam edərsə, bu hədələr təkrarlana bilər”, - deyə bildirən erməni portalı "Lragir” Rusiyanın dəstəyi ilə Azərbaycan tanklarının Naxçıvandan İrəvana hücum edəcəyini iddia edir. 

Qeyd edək ki, Ermənistan İstintaq Komitəsi Valeri Permyakova qarşı cinayət işi qaldırıb. Komitə onu Ermənistan Cinayət Məcəlləsinin 104-cü maddəsi ilə istintaqa cəlb etmək istəyir. Ermənilər Permyakov Ermənistanda mühakimə etmək istəyir, amma Moskva buna razılıq vermir. Rusiyanın 5-ci qarnizon məhkəməsi əsgərə qarşı Rusiya Federasiyasının Cinayət Məcəlləsinin iki maddəsi əsasında qətlə və fərariliyə görə cinayət işi qaldırılıb. 

Valeri Permyakov yanvarın 12-də Gümrü şəhərində Avetisyan ailəsinin 6 üzvünü qətlə yetirib. Yalnız 6 yaşlı Seryoja sağ qalıb. Valeri Permyakovu Ermənistan - Türkiyə sərhədində yerləşən Bayandur kəndində Rusiya sərhədçiləri tutub.

Hadisə Ermənistanda Rusiya hərbi bazasına qarşı ciddi etirazlara səbəb olub. Yüzlərlə insan İrəvandan Gümrüyə axın edərək hərbi bazanın və Rusiya konsulluğunun qarşısında etiraz mitinqi keçirir. Hazırda davam edən aksiyada etirazçılarla polis arasında qarşıdurma yaşanır. Aksiyada Rusiya bayrağı ayaqlar altına atılaraq tapdanıb.   (anspress.com)