Ötən ilin ölkəmiz üçün yaddaqalan, uğurlarla zəngin il olduğunu söyləmək olar.

Bəs görəsən şəhərimiz Sumqayıt üçün necə? 2014-cü il nə qədər zəngin və rəngarəngdir?

İlk öncə deməliyik ki, ötən il ərzində də şəhərimizdə abadlıq - quruculuq işləri davam edib: dənizkənarı Nəsimi parkının böyük bir hissəsi yenidən qurulub, "Sülh” küçəsində, Heydər Əliyev prospektində, şəhərin əsas küçələrində bərpa işləri davam etdirilib. Şəhərin ikinci girişi səliqəyə salınıb, asfalt yol çəkilib və s. Bütün bunlar adət etdiyimiz quruculuq işləri olduğundan onları hadisə kimi dəyərləndirməyəcəyik – bu işlər ötən illərdə başlamış prosesin davamıdır.

Bəs şəhərimiz üçün ilin yadda qalan hadisələri hansılar idi? Bu baxımdan 8 mühüm hadisə fərqləndirmişik. Gəlin onları nəzərdən keçirək:

Dövlət başçısının Sumqayıt səfəri

İlin şəhərimiz üçün ən mühüm hadisəsi prezident İlham Əliyevin Sumqayıta növbəti səfəri idi.  İlin əvvəlində - fevral ayının 25-də baş tutan səfər həm də onunla yadda qalan idi ki, dövlət başçısı şəhərimizdə bir sıra müəssisələrin açılışını etdi.

Yeni müəssisələr fəaliyyətə başladı

Mis emalı zavodu

Fevralın 25-də Sumqayıtda mis emalı zavodu fəaliyyətə başladı.

Ümumi dəyəri 10 milyon manatdan çox olan zavodun tikintisinə 5 milyon manat güzəştli kredit ayrılmışdır. Zavod elektroliz, mis qəbulu, ərinti və dik töküm sahələrindən ibarətdir. Zavodun işə düşməsi ilə həm də 70 nəfər işlə təmin olundu.  

Sumqayıt yağ fabriki

Yenə fevralın 25-də "Azərsun Sənaye Parkı”nda yaradılmış Sumqayıt yağ fabriki istifadəyə verildi.

Açılış zamanı verilən məlumata görə, fabrikdə illik olaraq 270 min ton yağ məlumatı, o cümlədən qarğıdalı, günəbaxan, marqarin yağları və əridilmiş yağlar, şokolad yağları və mayonezlər istehsal olunacaq. Məhsulların xarici ölkələrə ixracı da nəzərdə tutulur. Fabrikdə 259 yeni iş yeri yaradılıb. Gələcəkdə iş yerlərinin sayının 700-ə çatdırılması nəzərdə tutulur.

Kağız və karton istehsalat kombinatı

Bu müəssisə də "Azərsun Holdinq” MMC-nin nəzdində yaradılıb. Kombinatın yaradılmasında Sahibkarlığa kömək Millifondunun güzəştli krediti də mühüm rol oynamışdır. Hesablamalara görə, müəssisənin fəaliyyəti nəticəsində ildə 850 min şam ağacının kəsilməsinin və meşələrin  məhv olmasının, həmçinin atmosferə xeyli miqdarda zərərli maddələrin buraxılmasının qarşısı alınacaqdır.

Bələdiyyə seçkilərinin yeni simaları gəldi

Bələdiyyə seçkilərin bütün ölkəmiz üçün ilin ən mühüm hadisələrindən biri, bəlkə də birincisi idi. Seçkilər Sumqayıt şəhər Bələdiyyəsinin də tərkibində dəyişikliklərə səbəb oldu.

Son seçkilərdə Əbülfəz Babayev, Sultan Əsədov, Zeynəb Məmmədyarova, Musa Həsənov, Məmməd Hacıyev, Aygün Əhmədova, Ramiz Hüseynov,Akif Kərimov, Fərid Dəmirov, Emil Abbasov, Raqif İbrahimov, İlqar Cavadov, Fəxrəddin Rəhimov, Elbrus Səlimov, Günel Qiyasova, Elvin Məmmədzadə, Yusif Salmanov, İradə Talıbova və Kifayət Vidadiyeva bələdiyyə üzvləri seçildilər. (adları fərqləndirilənlər ötən seçkidən sonra da Bələdiyyədə təmsil olunmuşdular).

Sumqayıt 65 yaşını qeyd etdi

Sentyabrın 23-də Sumqayıt ənənəvi "Şəhər Günü” ndə təntənəli şəkildə qeyd etdi – həm də daha təntənəli. Çünki məhz bu il şəhərimiz 65 yaşını qeyd edirdi.

Möhtəşəm "Şəhər Günü” nə dövlət xadimləri, yerli və xarici qonaqlar, mədəniyyət ansamblları, şəhər ictimaiyyəti iştirak edirdi.

AXCP-də parçalanmalar

Bu il müxalifət düşərgəsində də müəyyən dinamika hiss olundu. Bu hərəkətlilik bir neçə kiçik miqyaslı piketlə özünü göstərdi. Şəhərimizdə yerləşən  müxalif düşərgə  təşkilatlarından birində baş verənlər isə bu düşərgə partiyalarından birinin adını ilin hadisələri arasına saldı. Belə ki, AXCP-nin Sumqayıt təşkilatının əvvəlki sədri Kəmaləddin Rəhimov başda olmaqla bir qrup üzvü partiyadan istefa verərək KAXCP sıralarına keçdi. İndiki sədrlə  (İsa Qurbanov) köhnə sədr arasında ciddi qalmaqal yaşandı. Qarşıdurma nəinki çap və internet mediasının gündəminə çıxdı, televiziyalara qədər gedib çıxa bildi.

Kadr dəyişiklikləri

İl ərzində ciddi kadr dəyişikliklərinin olduğunu söyləyə bilmərik. Ancaq iki məmur əvəzləməsini vurğulamaq olar. Onlardan biri Şəhər Gənclər və İdman Baş İdarəsinə 20 ildən artıq rəhbərlik etmiş Musa Həsənovun əvəzinə Ellmar Baxşaliyevin təyin olunması idi.

Digər dəyişiklik isə şəhər prokurorunun  əvəzlənməsi idi. Uzun illərdir şəhər prokuroru postunu tutan  Dağlar Zeynalovu Sərdar İmanov əvəz etdi. Qeyd edək ki, S.İmanov bundan öncə Suraxanı rayonunda eyni postu tuturdu.

(168saat.com)