YAP Sumqayıt şəhər təşkilatı Gənclər Birliyinin Sədri Fəridə Qafarova, 1-ci Qarabağ döyüşü və Vətən müharibəsi qazisi, "Füzuli”, "Xocavəndin” azad olunmasına görə və "Vətən müharibəsi” iştirakçısı medalları ilə təltif olunmuş, Azərbaycan Bayrağı Ordenli Zahir Həsənov, partiya fəalları və könüllülər 26 İyun Silahlı Qüvvələr Günü ilə əlaqdər olaraq Fəxri Xiyaban, Şəhidlər Xiyabanı və Hərbi Qənimətlər Parkını ziyarət ediblər.

Tədbir iştirakçıları ilk öncə Fəxri Xiyaban və Şəhidlər Xiyabanını ziyarət edib, Ulu Öndər Heydər Əliyev və Vətən uğrunda canlarından keçmiş şəhidlərimizin məzarları üstə gül dəstləri qoyublar. Daha sonra Şanlı qələbəmizin rəmzi olan Hərbi Qənimətlər Parkı ziyarət edilib. Partiyanın fəalları 44 günlük Vətən müharibəsi dövründə döyüş meydanında davamlı məğlubiyyətlərə məruz qalan düşməndən əldə etdiyimiz hərbi qənimətlərlə yaxından tanış olub.

Qeyd olunub ki, müzəffər Ordumuz cəmi 44 günlük İkinci Qarabağ müharibəsi zamanı əsl qəhrəmanlıq dastanı yazaraq möhtəşəm qələbə qazandı. müharibədə Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə formalaşan Azərbaycanın şanlı Ordusu düşməni diz çökdürdü. İşğal altında qalan torpaqlarımız cəsur əsgərlərimizin rəşadəti ilə düşmən caynağından xilas oldu. Nəticədə düşmən tərəfinin 30 il ərzində möhkəmləndirdiyi müdafiə xətləri yarıldı, hərbi resursları məhv edildi, işğal edilmiş torpaqlarımz düşmən tapdağından azad edildi. Ordumuzun qarşısında duruş gətirə bilməyən düşmən əsgərləri sözün həqiqi mənasında, mövqelərini qoyub qaçırdılar. Ordumuz isə bir-birinin ardınca işğal altında olan yaşayış məntəqələrimizi azad etməklə yanaşı ermənilərin qoyub qaçdığı atıcı silahları, ağır texnikaları, raket komplekslərini, hərbi nəqliyyatları və digər sursatları qənimət kimi ələ keçirdi.

Qeyd edək ki, Parkda Vətən müharibəsinin gedişində düşməndən qənimət götürülən hərbi texnikanın bir qismi, ümumilikdə 300-dən çox eksponat, o cümlədən 150-dək ağır texnika, tanklar, döyüş maşınları, artilleriya qurğuları, zenit-raket kompleksləri, atıcı silahlar, hərbi nəqliyyat sərgilənir. Təqdim edilən eksponatlar, 10 səddən ibarət müdafiə sistemi, sığınacaqlar, hərbi kazarmalar, Vətən müharibəsinin gedişatı barədə məlumatlar Azərbaycana Zəfər qazandıran döyüşləri bir daha göz önündə canlandırmağa geniş imkan yaradır. Parkdakı eksponatların arasında Silahlı Qüvvələrimizin işğaldan azad olunan ərazilərdə ermənilərdən qənimət götürdükləri 2 mindən çox avtomobilin nömrə nişanlarından hazırlanan və üzərində "Qarabağ Azərbaycandır!” şüarı əks olunan kompozisiya, Ermənistan tərəfindən törədilən müharibə cinayətləri, o cümlədən döyüş bölgəsindən uzaq olan ərazilərimizin raket zərbələrinə məruz qalması, dinc sakinlərin qətlə yetirilməsi və yaralanması barədə faktlar, düşmən tərəfindən Azərbaycan ərazisinə atılmış "İskəndər-M” raketinin qalıqları var. Yaradılmasına bu ilin yanvar ayından başlanılan və 5 hektar ərazini əhatə edən Hərbi Qənimətlər Parkı paytaxtın Xətai rayonunda yerləşir.

 

 

 

 

 

 

 

 

 

 

 

 

 

 

 

 

 

 

Xəbərdən istifadə edərkən istinad etmək vacibdir.