Yerli rejissorlar bunu bir sıra səbəblərə bağlayırlar. Bəziləri deyir buna sponsor lazımdır. Bir çoxu hər şeyi bir kənara qoyub, sırf texniki səbəbləri ortaya atır. Elələri də var ki, deyir mən çəkərəm, ssenari olsa..Və ya peşəkar aktyor axtaranlar da üzə çıxır..
Bir sözlə, edərdim, edərəm, axı, əgər..falan filan..
Haqqında danışacağımız film "Hollywood" istehsalı deyil. Rejissoru da əcnəbi deyil. Heç milyonlar da xərclənməyib. Peşəkar aktyorlardan söhbət gedə bilməz.
Görəcəyiniz kadrlar Şəkidə çəkilib. Bəli, bizim Şəkidə. Söhbət ölkənin ilk real action janrında çəkilən "Kölgəsiz" filmindən gedir.
"Rec Film" studiyasının rəhbəri, gənc rejissor Rəvan Cabbarov minimal imkanlarla sözün əsl mənasında xariqələr yaradıb. O filmin həm rejissoru, həm ssenari müəllifi, həm montajçısı, həm operatorudur. Bir sözlə, bir özü özünü çəkməyib.
Rəvan deyir: "bizdə hamı elə bil kimisə gözləyir ki, gəlib ona film çəkəcək. Çəkənlər də köhnə standartlardan çıxa bilmirlər. Tamaşaçı bir xaricə baxır, bir də bizimkilərə. Onlarda dinamika var. Bizdə isə rejissorlar kameranı ştativdən götürmək istəmirlər."
Gənc rejissorun sözlərinə görə, hər zaman qorxulu film çəkmək arzusu olub: "Düzdü"Kölgəsiz" dəhşət janrında deyil, amma burda da adrenalin yüksək səviyyəyə çıxır.
Filmdə istifadə olunan texnika da bahalı deyil. Bəzən lazım olan avadanlığı öz bacarığımızla ərsəyə gətirmişik. Komanda işi də burda əsasdır. Buraya qədər çəkdik. Amma baxdıq ki, salam-sağolla, dost tanışın yardımı ilə burdan artığını etməkdə həqiqətən çətinlik çəkirik. Çəkilişlər müvəqqəti dayndırıldı. İndi artıq sponsor da var. "Kölgəsiz"in çəkilişlərinin davamına bu yaxınlarda başlayırıq."
Rəvan daha əvvəllər bir sıra reklam çarxları, kliplər, qısa metrajlı filmlər çəksə də bu böyük kinoda ilk işidir. Siftəni isə gənc rejissor kor eləmək istəmir. Deyir: "bu ilin sonunda bütün Azərbaycan bizim filmdən danışacaq".
Filmin baş rol ifaçısı Rahim Xəlilovdur. Döyüşlər və təhlükəli səhnələr montajsız real oynanılmış səhnələrdir. Eyni zamanda filmdə Rusiyadan dəvət olunan Elina Əliyeva da əsas rollardan birini oynayır. Qeyd edilən yaradıcı heyətlə yanaşı, Perviz Abdurahmanov, Namiq Aslanov, Məhdi Əliyev, Almaz Qasımova da filmdə yer alıb.
"Kölgəsiz" filminin 3 dildə (Azərbaycan, rus və ingilis) təqdim olunması gözlənilir. Sentyabrda böyük ilkbaxışın keçirilməsi nəzərdə tutulub.
/tezxeber.az/
|
|
Xəbərdən istifadə edərkən istinad etmək vacibdir.
