Azərbaycanın hərb tarixinə qızıl hərflərlə yazılan 44 günlük haqq mübarizəsi və böyük zəfər ordumuzun döyüş əzmini istər düşmənə, istərsə də bütün dünyaya sübut etdi. Bu müqəddəs savaşın yenilməz qəhrəmanları ilə tanış olduqca bir daha fəxr və qürur hissi duyuruq.
Sumqayıt Regional Mədəniyyət İdarəsinə tabe olan Qubadlı rayon Fəxrəddin Hüseynov adına Mahmudlu kənd Uşaq Musiqi Məktəbinin kollektivi Qazi Qəhrəman Ağacanovu ziyarət ediblər.
Onlar Qəhrəmanın keçdiyi döyüş yolu haqqında söhbətlər ediblər, hər zaman onun kimi digər qazilərimizində yanında olduqlarını vurğulayıblar.
Adı kimi özü də qəhrəman olan Qəhrəman Ağacanov 24 oktyabr 2000-ci ildə Sumqayıtda anadan olub. Uşaq yaşlarında xəstəlik nəticəsində anasını, daha sonra 16 yaşında atasını itirib. Qəhrəman özündən 3 yaş böyük qardaşı ilə birgə qalır.
Qəhrəman 2019-cu il iyulun 3-də həqiqi hərbi xidmətə çağırılıb. Ağacabədidə xidmətə başlayıb. Müharibə zamanı Füzuliyə göndərilib, artilleriya topçusu olub. Qazimiz Füzulidən Şuşaya qədər şərəfli döyüş yolu keçib. İgidimiz döyüş zamanı verilən bütün təlimatları yerinə yetirmiş və komandirin bütün əmrlərinə əməl edərək nümunəvi əsgər olmuşdur.
Cəsur savaşçı 8 noyabr-Şuşanın azad edildiyi gün yaralanıb. Minaatanın qəlpəsi sağ almacıq sümüyünü dağıdıb və başından qəlpə yarası alıb.
Məktəbin kollektivi tərəfindən qazimizə sovqat təqdim olunub.
Allah şəhidlərimizə rəhmət, qazilərimizə isə can sağlığı versin!
Xəbərdən istifadə edərkən istinad etmək vacibdir.
