Son vaxtlar havaların soyuq keçməsi Sumqayıt şəhərində istilik sistemlərində problemlər yaradıb. Nəzərdə tutulmuş binalara, dövlət idarələrinə istiliyin tam verildiyi bildirilsə də, şəhər sakinləri bununla razılaşmırlar.
"Narazı olanların şikayətinə baxanda gülürəm"
Bu sözləri Sumqayıt şəhəri 8-ci mkr.-da yerləşən 3 saylı Sumqayıt şəhər uşaq poliklinikasından olan şikayətə aydınlıq gətirərkən "Azəriistiliktəchizat"ın Sumqayıt şəhər idarəsinin rəisi Aftandil Nuriyev dedi. İdarə rəisi onu da qeyd etdi ki, qeyd olunan 8-ci mkr.-da ümumiyyətlə istilik qazanxanası mövcud deyil:
"Əvvəla, onu deyim ki, bu işlə biz yox, "Azəriistilik" ASC məşğuldur. Bu iş də planlı şəkildə baş verir. Bildiyiniz kimi, SSR dövründən sonra bir çox qazanxanalar sıradan çıxdı. Sıra-sıra bütün Sumqayıt bu cür istilik qazanxanaları ilə təmin olunacaqlar. Həmin poliklinika da bu üzdən istilik sistemindən məhrumdur".
"Azəriistiliktəchizat"ın açıqlamasından sonra istədik ki, məsələni Sumqayıt şəhər Səhiyyə şöbəsi ilə aydınlaşdıraq. Görək, onlar bu cür hallarda polikilinikaları və tibb ocaqlarını istiliklə necə təmin edirlər. Bu minvalla, Səhiyyə şöbəsinə zəng edib məsələyə aydınlıq gətirilməsini istədik. Lakin şöbənin əlaqələndirici şəxsi İradə Məmmədova bizə bildirdi ki, rəhbərliyə bildirib sizə bir cavab deyəcəyik. Bundan sonra redaksiyamıza nə zəng, nə də heç bir açıqlama gəlmədi. Bunu görüb, özümüz "dağın yanına getdik". Sumqayıt Səhiyyə şöbəsinin baş pediatoru Xalidə Quliyeva hadisə ilə bağlı açıqlamasında bildirdi ki, qeyd olunan poliklinikada heç bir istilik sistemi yoxdur. Səbəb isə həmin poliklinikaya qazın verilməməsi və qazanxananın olmamasıdır.
"Biz həmin poliklinikanın istiliklə təmin edilməsi üçün ora kifayət qədər qızdırıcı radiatorlar və peçlər vermişik. Bir gün orada işıq olmayıb, bunu şişirdiblər" - deyə xanım Quliyeva bildirdi.

Abbasəli Hüseyni
XeberLent.az
P.S. Ümid edirik ki, Sumqayıtdakı rəhbər qurumlar bu problemi həll etməkdə tələsəcəklər. Çünki yaz və yay fəsillərində daha onların köməyinə ehtiyac qalmayacaq, Günəş öz isti şüaları ilə onların "paxırını gizlədəcək”.