Bu gündən Azərbaycanda ictimai iaşə müəssisələrinə, mehmanxanalara və iri ticarət mərkəzlərinə getmək istəyən yaşı 18-dən yuxarı olan bütün şəxslərdən COVID-19 pasportu tələb olunur. Baş nazir Əli Əsədovun bu barədə ötən ay imzaladığı qərar sentyabrın 1-dən qüvvəyə minib. Qərarda açıq şəkildə bildirilir ki, adı çəkilən qapalı məkanlara giriş COVID-19 pasportu ilə mümkün olacaq.
Xeberle.com-un məlumatına görə, buna baxmayaraq Sumqayıtda fəaliyyət göstərən "Ən Ucuz Marketlər" şəbəkəsinə daxil olan "Əli 94" supermarketində qanunazidd olaraq vətəndaşlardan Covid 19 pasportu ilə yanaşı şəxsiyyət vəsiqəsi də tələb olunur. Maraqlısı odur ki, covid pasportu olan şəxslər ş/v təqdim etmədikdə mağaza ərazisinə buraxılmır. Atılan bu addım vətəndaşlar tərəfindən haqlı narazılığa səbəb olub. Mağaza sahibləri bu tələbin Sumqayıt İcra Hakimiyyəti tərəfindən qoyulduğunu vurğulayır. İcra Hakimiyyəti isə bu addımın yolverilməz olduğunu qeyd edərək sahibkarlara belə bir göstərişin verilmədiyini vurğulayıb.
Məlumat üçün bildirək ki, Operaqtiv Qərargah tərəfindən verilən qərarda ərzaq mağazalarında da COVID-19 pasportu ilə girişin tətbiq olunması haqda heç bir informasiya qeyd olunmayıb.
Xeberle.com
Xəbərdən istifadə edərkən istinad etmək vacibdir.
