"Avropa İttifaqının "EU4CULTURE" layihəsi çərçivəsində Sumqayıt şəhərinin Mədəni İnkişaf Strategiyasının hazırlanmasında iştirak etmək və töhfə vermək istəyən şəxslərin axtarışındayıq".
Xeberle.com xəbər verir ki, bu barədə Sağlam Düşüncə Gənclər Təşkilatının (SDGT) təsisçisi Ramiz Əliyev Feysbuk sosial şəbəkəsində paylaşım edib. R.Əliyev bildirib ki, Sumqayıt şəhər icra hakimiyyəti ilə birlikdə EU4Culture, "Mədəni İnkişaf Strategiyalarının Hazırlanmasında Şərq Tərəfdaşlığı Bölgəsinin qeyri-paytaxt şəhər və rayonlarına dəstək" müsabiqəsinə Sumqayıt şəhəri adından müraciət edib və ilk mərhələdən uğurla keçən və tam layihə təqdim etmək hüququ əldə edən 5 Azərbaycan şəhərindən (Sumqayıt, Şəki, Gəncə, Xırdalan, Lənkəran) biri olub.
Növbəti mərhələdə isə layihə komandası olaraq Sumqayıtın Mədəni İnkişaf Strategiyalarının Hazırlanması istiqamətində layihə təklifi hazırlanacaq və bu istiqamətdə şəhərin bütün təbəqələrini əhatə edəcək bir fokus qrup formalaşdırılacaq. Bu qrupun tərkibi layihənin əsas meyarlarından biridir. Bu baxımdan fokus qrupunun formalaşdırılmasında hər kəsdən dəstək gözləyirik.
Axtardığımız şəxslərin əsas meyarları
- Şəhərin təməlinin qoyulmasında iştirak etmiş və əməyi olmuş şəxslər
- Şəhərin mədəni, ictimai, siyasi həyatında fəal iştirak etmiş şəxslər
- Şəhərin mədəni inkişafında ideya sahibi olan şəxslər
- Və ən əsası Sumqayıtın mədəni inkişafına töhfə verməkdə kifayət qədər həvəsli və maraqlı olan şəxslər
Marağı və həvəsi olan və ən əsası vaxt ayıra biləcək şəxslərin bizimlə əlaqə saxlamasını xahiş edirik. Layihə təklifi dəstəkləndiyi təqdirdə bu fokus qrupla mütəmadi olaraq görüşlər və müzakirələr təşkil ediləcək.
Əlaqə üçün son tarix: 10.09.2021
Xəbərdən istifadə edərkən istinad etmək vacibdir.
