"Sumqayıt şəhərində analoji vəziyyətlə artıq bir neçə dəfə rastlaşmışıq. Son yanğın zamanı sakinlər tərəfindən "Sağlam Mühit və Sağlam Gələcək" İctimai Birliyinə də bir neçə şikayət xarakterli müraciət daxil olub".

Bu barədə AMEA Torpaqşünaslıq və Aqrokimya İnstitutunun elmi işçisi, Biologiya üzrə fəlsəfə doktoru Elnur Nəsirov bildirib. O söyləyib ki, baş vermiş yanğın həmin gün əhalinin səhhətinə mənfi təsir göstərdi. Alimin sözlərinə görə, bu hadisədən sonra baş verən atmosfer çirklənməsi bu günlərdə yağan yağışlarla böyük radiuslu ərazilərə də yayıldı: 

"Sözsüz ki, bir müddət sonra bu özünün mənfi təsirlərini bir daha göstərəcək. Poliqonda məişət tullantılarının yandırılması fikrini qəti söyləmək olmaz. Məişət tullantıları öz-özünə alışa da bilər. Bu məsələdə ən təsirlisi, əlaqədar qurumların - "Biz hələ ki, bu problemin qarşısında acizik", deməsidir. Belə olan halda postlarınızdan imtina edin və yerinizi problemden çıxış yolu tapa biləcək insanlara verin. Xarici olkələrin təcrübələrindən görünür ki, məişət tullantılarının həm təkrar emalı nəinki mümkündür, hətta kanalizasiya tullantılarının təmizlənməsi praktikası da mövcuddur. Bu yaxınlarda Bill Qeytsin kanalizasiya suyunun təmizlənməsindən alınan içməli sudan dadması da bunu bir daha sübut etdi. Biz isə hələ məişət tullantılarından necə yaxa qurtarmağın yollarını tapa bilməyib, vəzifəmizin onları yandırmaqla bitməsinə özümüzü inandirmaq istəyirik".
Elnur Nəsirov qeyd edib ki, Azərbaycanda və Sumqayıtda baş verən hər bir ekoloji pozuntu, ətraf mühitə və insan sağlamlığına zərər verirsə, bu, bütövlükdə cəmiyyətin problemidir:  "Əlaqədar qurumlar bu kimi arzuolunmaz halların baş verməməsi üçün əvvəlcədən tədbirlər planı hazırlamalı, tullantıların idarə olunmasını sistemli şəkildə həyata keçirməlidir, daha yandırmaq yolu ilə yox". (Xəzərİnfo)

Xatırladaq ki, yanvarın 21-də Sumqayıtın çıxışında yerləşən, Sumqayıt və Xırdalan şəhərlərinin bütün məişət tullantılarının atıldığı poliqonda zibillərin yandırılması, sakinlərin ciddi narahatlığına, həyəcana səbəb oldu. Bu hadisədən belə bir qənaətə gəlmək olar ki, Sumqayıt şəhərinin və Abşeron yarımadasının ekoloji çirklənməsi prosesi davam etməkdədir.

Xeberle.com