Bu seçki yarışını digərlərindən fərqləndirən önəmli bir məqam var: parlmentin növbədənkənar formalaşdırılması ciddi siyasi reformlar, kadr və struktur islahatları fonunda baş verir.
Prezident İlham Əliyevin  "Parlament seçkiləri çox önəmli hadisədir və önəmli prosesdir. Mən artıq qeyd etdiyim kimi, ölkəmiz yeni islahatlar dövrünə qədəm qoydu, Prezident Administrasiyası, Nazirlər Kabineti, bəzi mərkəzi icra orqanları, yerli icra orqanları artıq struktur islahatlarını başa çatdırıblar, yaxud da ki, bu islahatlar davam etdirilir. Belə olan halda, parlament də kənarda qala bilməz və növbədənkənar parlament seçkilərinin əsas məqsədi ondadır ki, vaxt itirmədən yeni çağırışlara uyğun qanunvericilik bazası formalaşsın və qanunvericilik sahəsində atılan addımlar ümumi islahatlar kursunu dəstəkləsin”. – deyə  bəyan etməsi ölkə rəhbərinin ortaya güclü iradə qoymasından xəbər verir.
Prezident həmçinin bəyan edir ki, Azərbaycanda parlament seçkiləri şəffaf keçiriləcək: "Azərbaycan xalqı öz iradəsini göstərəcək və nəticələr Azərbaycan xalqının iradəsini əks etdirəcək. Azərbaycan xalqı layiqli nümayəndələri seçəcək. O nümayəndələr ki, öz qanunvericilik fəaliyyətlərində ümumi işimizə töhfə verəcək”.
Dövlət rəhbərinin dedikləri, ölkənin ali siyasi rəhbərliyinin 9 fevral seçkilərinin ədalətli, tam demokratik şəkildə keçirilməsi və xalqın iradəsini ifadə etməsi xüsusundakı qətiyyətli mövqeyinin növbəti açıq ifadəsi kimi qiymətləndirilir.
Ölkə rəhbərinin göstəriş və tapşırıqlarına rəğmən hələ də bir sıra icra başçıları öz çirkin əməllərindən qalmır, pis  niyyətlərini həyata keçirmək, seçkilərin saxtalaşdırılması üçün səy göstərirlər.
Bir müddət bundan öncə həbs olunan icra başçılarına Prezident İlham Əliyev ciddi xəbərdarlıq etdiyini və onların isə buna məhəl qoymadıqlarını bildirmişdi.
Qeyd edək ki, ölkə başçısı  rayonlara icra başçıları  təyin edərkən bu sözləri demişdi: ”Bütün xoşagəlməz hallara son qoyulmalıdır, rüşvətxorluq, korrupsiya tamamilə yığışdırılmalıdır. Mən sizə şəxsən bu göstərişi verirəm. Əgər eşitsəm, bilsəm ki, əyri yola gedirsiniz, onda siz çox ciddi cəzalandırılacaqsınız”.
Artıq bəzi dairələrdə saxtakarlıq ediləcəyini cəhdlər hiss olunmaqdadır. Elə bu günlərdə Xətai rayonu 35 saylı üçüncü dairə seçki komissiyasının sədri İmran Hüseynəliyev tutduğu vəzifədən istefa verib. Onun istefa verməsinə səhhətində yaranan ciddi problemlər  səbəb olduğu bildirilsə də, əsas məsələnin seçki prosesində qeyri-demokratik üsullara əl atmağa cəhd etməsi göstərilir.
Ölkədə keçirilən parlament seçkilərində saxtakarlıq etdiklərinə görə 3 dairənin nəticəsinin ləğv ediləcəyi, həmin dairə sədrlərinin həbsinin baş verəcəyi ehtimal olunur.
Bununla yanaşı, həmin dairələrin olduğu ərazilərin icra başçılarının da vəzifədən azad ediləcəyi bildirilir.
Belə bir hal Azərbaycanda 15 il bundan öncə də yaşanıb. 2005-ci ilin parlament seçkilərindən 42 saylı Sumqayıt II seçki dairəsinin nəticələri ləğv olunmuş DSK-nın sədri Tofiq Abdullayev və 17 saylı məntəqənin sədri Şükür Əzimov seçkilər zamanı səlahiyyət həddini aşaraq, insanların seçmək və seçilmək hüququna müdaxilə edib, rəsmi seçki sənədlərini saxtalaşdırdıqlarına görə həbs olunmuşdular.
Xatırladaq ki,  bir müddət öncə isə Prezident İlham Əliyev ölkədə keçirilən seçkilərə məmurların və digər şəxslərin müdaxiləsinin yolverilməzliyi ilə bağlı xəbərdarlıq edib və qanunsuz hərəkətlərə yol verənlərin ciddi şəkildə cəzalandırılacağını deyib.(unikal.org)