Bu gün Azərbaycanda dövlət siyasətinin mühüm tərkib hissəsi olan gənclərlə işə böyük önəm verilir. Ümumiyyətlə, Azərbaycan gəncliyi ictimai həyatın bütün sferalarında aktiv fəaliyyəti ilə seçilir və siyasi, elmi, iqtisadi, humanitar, sosial tədbirlərin həyata keçirilməsində mühüm rol oynayır. Dövlətin gənclərin fəaliyyəti üçün yaratdığı geniş imkanlar nəticəsində bu təbəqə cəmiyyətin aparıcı qüvvələrindən birinə çevrilib.
Gənc nəslin tərbiyəsi, ölkənin hərtərəfli inkişafı, gənclərin zərərli vərdişlərdən uzaq olması, onların hazırda qorxulu kabusa çevrilən radikal dini qruplaşmaların əsirinə çevrilməməsi baxımından elm və təhsilin rolu, bu istiqamətdə həyata keçirilən layihə və tədbirlərin faydası, şübhəsiz ki, böyükdür.
Aydın məsələdir ki, elm olmayan yerdə ixtisaslı kadrlar da, inkişaf da və deməli, gələcək də olmayacaq. Elmə doğru gedən yol isə təhsildən keçir. Məlum olduğu kimi, xalqımızın Ümummilli lideri Heydər Əliyev elm və təhsil sahəsinə daim böyük diqqət və qayğı göstərib və sevindirici haldır ki, dahi rəhbərin siyasəti Azərbaycan Prezidenti İlham Əliyev tərəfindən əzmlə davam etdirilir. Bəli, hazırda Azərbaycanda gənc nəslin elm və təhsilə cəlb olunması üçün dövlət tərəfindən mühüm addımlar atılır. Bunun bariz nümunəsi olaraq Elmin İnkişafı Fondunun, Bilik Fondunun gənc tədqiqatçılar üçün yaratdığı şəraitdən, perspektivlərdən, həyata keçirilən layihələrdən söz açmaq kifayətdir. Eyni zamanda, hər il dövlət büdcəsindən elm və təhsilə milyonlarla manat vəsait ayrılır. Təhsil sahəsində həyata keçirilən siyasətdən bəhs edərkən xüsusi olaraq vurğulamaq yerinə düşər ki, Prezident İlham Əliyevin sərəncamları, Heydər Əliyev Fondunun təşkilatçılığı ilə son illərdə ölkəmizdə 800-dək məktəb tikilib, yaxud əsaslı şəkildə təmir edilib və ən son avadanlıqlarla təhciz edilib.
Lakin bu bir həqiqətdir ki, ölkədə elmi təfəkkür, elmi potensial heç də təkcə dövlət nəzarəti altında olan strukturlarda formalaşmır. Bunun üçün müxtəlif elmi cəmiyyətlər, qurumlar, QHT-lər yaradılır və fəaliyyət göstərir, həmçinin, onların vasitəsi ilə müvafiq layihə və tədbirlər həyata keçirilir. Ölkəmizdə qeyri-hökumət xarakterli neçə-neçə belə elmi birlik, təşkilatlar var. Eyni zamanda, müşahidələr onu deməyə əsas verir ki, xüsusilə gənc tədqiqatçılar arasında maarifləndirmə işinin aparılmasına, müvafiq layihələrin həyata keçirilməsinə ehtiyac duyulmaqdadır.
Odur ki, Gənc Politoloqlar Mərkəzinin (GPM) Azərbaycan Respublikasının Prezidenti yanında Gənclər Fondunun dəstəyi ilə 15 noyabr 2014-cü il tarixindən dekabrın sonunadək icra etdiyi "Gənc tədqiqatçıların elmi potensiallarının artırılması” (GTEPA) adlı layihəsini təqdirəlayiq hesab etmək olar.
Gənc Politoloqlar Mərkəzinin müxtəlif elmlərə maraq göstərən, elmi dünyagörüşlü, dünyəvi baxışlara malik olan gənc, həmçinin, potensial gənc elmi tədqiqatçıların və gənc politoloqların elmi tədqiqata həvəsləndirilməsi məqsədilə həyata keçirilən bu layihəsinin əhəmiyyəti olduqca böyükdür. Gənc tədqiqatçıların elmi potensialının artırılması məqsədi ilə reallaşdırılan sözügedən layihəyə müxtəlif elm sahələri üzrə elmi tədqiqatlar aparan magistr, dissertant və doktorantlar, gənc alimlər və ümumiyyətlə, elmi tədqiqata meyilli olan potensial gənc tədqiqatçılar cəlb olunub. Gənclərə müasir tədqiqat metodlarının öyrədilməsi və təcrübədə tətbiq edilməsi məqsədi ilə həyata keçirilən bu layihədən ümumilikdə 50 gənc elmi tədqiqatçı faydalanıb və onların bəziləri də layihədən sonra da faydalanacaqlar.
Layihə çərçivəsində hər həftənin 1-ci və 5-ci günləri Odlar Yurdu Universitetinin kiçik akt zalında alimlər, təcrübəli universitet müəllimləri, peşəkar mütəxəssislər tərəfindən elmi tədqiqatların metod və vasitələri, elmi tədqiqatın planlaşdırılması, elmi tədqiqatçıların potensialının artırılması yolları, onlar qarşısında duran problem və çətinliklər, ənənəvi və yeni elm sahələri, elmlə bağlı əsas yanaşmalar və elmin növləri, elmin yeni inkişaf meyilləri və gələcək istiqamətləri, sosial araşdırma, sorğu və statistika və sair kimi mövzular üzrə təlim-seminarlar keçirilib. Təlimlərin ikinci hissəsində isə müasir dünyada baş verən proseslərə, xüsusən də ölkəmizlə bağlı aktual siyasi, sosial, iqtisadi problemlərə, məsələlərə toxunulub, "Dağlıq Qarabağ münaqişəsi”, "Azərbaycanın neft-qaz strategiyası”, "Azərbaycanda elm və təhsilə dövlət qayğısı”, "Azərbaycanın geostrateji vəziyyəti”, "Cənubi Qafqaz regionlaşma problemləri və gələcək perspektivlər”, "Cənubi Qafqazda başlıca təhlükəsizlik məsələləri”, "Ölkəmizin beynəlxalq təşkilatlardakı fəaliyyəti”, "Mədəniyyətlərarası münasibətlər və sivilizasiyalararası dialoq” , "Xəzərin statusu və hövzə ölkələrinin mövqeyi”, "Gənclərin xarici ölkələrdə elmi potensialının artırılması istiqamətində görülən işlər” və sair mövzular üzrə seminar-məşğələlər keçirilib. Həmin təlimlər onunla fərqlənib ki, tədbirlərin əksəriyyəti diskussiya və qaynar müzakirələr şəraitində keçib.
Qeyd etdiyimiz kimi, layihədə 50-dən çox gənc tədqiqatçı aktiv iştirak edib və bundan faydalanıb. Nəticədə 1 doktorantın elmi mövzusunun adında dəyişiklik edilib, 4 magistrə gələcək elmi tədqiqat işinin mövzusunun müəyyənləşdirilməsində tövsiyə xarakterli yardım göstərilib, xeyli tələbədə isə gələcəkdə elmi tədqiqata maraq yaradılıb.
Layihə çərçivəsində gənclərin elmi tədqiqat işlərinə marağının müəyyənləşdirilməsi yönündə GPM hədəf qrupu arasında sosioloji anket sorğusu aparıb və hesabat hazırlanıb. Layihənin gedişində Gənc Politoloqlar Mərkəzi Odlar Yurdu Universiteti ilə birlikdə 11 dekabr 2014-cü il tarixində Ümummilli lider Heydər Əliyevin xatirəsinə həsr olunmuş anım mərasimi keçirib.
Layihə 24 dekabr 2014-cü ildə GPM-in Odlar Yurdu Universiteti ilə birlikdə təşkil etdiyi böyük elmi-praktik konfransla yekunlaşıb. Konfransa Azərbaycan Respublikası Prezidenti Administrasiyasının İctimai-siyasi məsələlər şöbəsinin sektor müdiri, Yeni Azərbaycan Partiyası (YAP) Siyasi Şurasının üzvü, siyasi elmlər üzrə fəlsəfə doktoru Qafar Əliyev, Odlar Yurdu Universitetinin rektoru, professor, Milli Məclisin deputatı Əhməd Vəliyev, siyasi elmlər doktoru, professor, Azərbaycan Respublikası Prezidenti yanında Dövlət İdarəçilik Akademiyası nəzdində Siyasi Araşdırmalar İnstitunun direktoru, YAP-ın Beynəlxalq əlaqələr komissiyasının katibi Elman Nəsirov, Azərbaycan Respublikasının Prezidenti yanında Gənclər Fondunun sektor müdiri Orxan Ərəbov, "Olaylar” İnformasiya Agentliyinin baş direktoru, publisist, tarixçi, türkoloq və yazıçı Yunus Oğuz, həmçinin, elm adamları, tanınmış ictimaiyyət nümayəndələri qatılıblar.
Xüsusi olaraq vurğulamalıyıq ki, layihə çərçivəsində təşkil olunan seminar-diskussiyalardan biri "Dağlıq Qarabağ münaqişəsinin həlli istiqamətində gənc tədqiqatçıların əsas elmi-siyasi yanaşmaları, problemin həlli perspektivləri və elmi, siyasi və geostrateji mülahizələr” mövzusuna həsr edilib. Müzakirə zamanı seminar iştirakçıları Dağlıq Qarabağ münaqişəsinin həlli ilə bağlı Ümummilli lider Heydər Əliyevin müəyyən etdiyi siyasi strategiyanın və taktikanın düzgünlüyündən, Azərbaycan Respublikasının Prezidenti İlham Əliyev tərəfindən həyata keçirilən balanslaşdırılmış xarici siyasətin və diplomatiyanın uğurlarından bəhs ediblər. Daha sonra gənc tədqiqatçılar Dağlıq Qarabağ münaqişəsinin mümkün həlli yollarını müzakirə edərək, problemin həllinin hərbi yolla və ya siyasi dialoq sülh yolu ilə mümkünlüyü variantları barədə fikir mübadiləsi aparıblar. Seminar iştirakçıları elmi-siyasi yanaşmalarla və tutarlı elmi mülahizələrlə dünyada gedən hazırkı prosesləri məntiqi cəhətdən təhlil edərək belə bir elmi qənaətə gəliblər ki, problemin həllinin sülh yolu ilə nizamlanması ən doğru, siyasi və elmi cəhətdən əsaslandırılmış bir yoldur. Lakin bu yol o şərtlər daxilində öz elmi təsdiqini tapa bilər ki, Ermənistanın rəhbərliyi tezliklə tutduğu siyasi xəttin qeyri-sağlam və qeyri-konstruktiv olduğunu dərk etsin və işğalçılıq siyasətindən əl çəkərək zəbt etdiyi torpaqları qeyd-şərtsiz boşaltsın. Bu mümkün olmadıqda gec-tez problemin hərb yolu ilə həlli variantı qaçılmaz olacaq. Bu haqda Azərbaycan Prezidentinin dəfələrlə səsləndirdiyi bəyanatların elmi-siyasi baxımdan düzgün və əsaslı olması da seminarda vurğulanıb. Məruzəçi və seminar iştirakçıları bu istiqamətdə elmi-tədqiqat işlərinin daha çox yazılmasını, xüsusilə reytinqli beynəlxalq elmi jurnallarda məqalələr dərc edilməsinin vacibliyini qeyd ediblər. Həmçinin, dünyanın müxtəlif dövlətlərində elmi-strateji dairələrlə birlikdə seminarlar, simpoziumlar, konfransların keçirilməsi, ələlxüsus da müxtəlif xarici dillərdə olan elmi nəşrlərin, məqalələrin dərc olunub yayılması zəruriliyi həmin seminarda vurğulanıb.
Layihəyə qatılan iştirakçılar əldə etdikləri biliklərə və göstərdikləri nəticələrə görə Gənclər Fondunun və GPM-in birgə hazırladığı xüsusi sertifikatlarla təltif olunublar.
Elnur Ağayev,
GPM-in sədr müavini,
layihənin koordinatoru
