Prokurorluğun binası Şəhər Mədəniyyət Evi söküldükdən sonra onun yerində tikilməkdədir.
Qeyd edək ki, Şəhər Mədəniyyət Evi 1963-cü ildə xüsusi layihə üzrə tikilərək istifadəyə verilmişdi. Ümumi sahəsi 1067,6 kv.metr, binanın istifadə olunan sahəsi 900,5 kv.metr idi. Şəhərdə ilk rəqs meydançası məhz Şəhər Mədəniyyət Evinə həvalə edilibmiş. Mədəniyyət evinin "Yay zalı”nda müxtəlif şou proqramlar, teatr tamaşaları, kinofilmlər nümayiş etdirilib. Burada keçmiş SSRİ-nin müxtəlif şəhərlərindən olan estrada qruplarının konsertləri təşkil edilmiş, müxtəlif tipli (estrada, xalq) qrupları yaradılmışdır. "Varislər”, "Karvan” və s. estrada qrupları bu qəbildəndir. Mədəniyyət evində hal-hazırda fəaliyyət göstərən "Gənclik” xalq çalğı alətləri ansamblı 1968-ci ildə yaranmışdı. 1976-cı ildə "Töhfə” adlı ansamblı yaradılmışdır. Cəlilovlar ailəsinin üzvlərindən ibarət olan ansambl 12 nəfər müxtəlif musiqi alətlərində ifa edən musiqiçilərdən və rəqqaslardan təşkil olunmuşdur. 1980-ci ildə 28 nəfər müharibə və əmək veteranlarından ibarət "Veteranlar” beynəlmiləl xoru yaradılmışdır. 1985-ci ildə Mədəniyyət Nazirliyinin kollegiyasının 4 №-li qərarı ilə xora "xalq” kollektivi adı verilmişdir. Xor kollektivi baxış müsabiqələrdə, festivallarda, respublika üzrə keçirilən tədbirlərdə iştirakçı olmuş, fəxri fərman və diplomlarla təltif edilmişdir. 1982-ci ildə Şəhər Mədəniyyət Evində "Spektr” adlı diskoteka dansinq yaradılmışdır. Bu kollektiv Sumqayıt şəhər İcra Hakimiyyəti tərəfindən fəxri fərmana layiq görülmüşdür. 1983-cü ildə "Bədii qiraət” briqadası yaradılmışdır. 6 nəfərdən ibarət olan bu kollektiv şəhər tədbirlərində və təhsil müəssislərində böyük uğurla çıxış etmişdir. Bu briqada fəxri fərmanla və bir neçə diplomla təltif edilmişdir.Şəhər Mədəniyyət Evində müxtəlif kurslar fəaliyyət göstərmişdir. Burada Xalq universiteti, musiqi kursları, sənət öyrətmə və digər dərnək və kurs birlikləri təşkil olunmuşdur.
Son zamanlaradək mədəniyyət evində 12 nəfərdən ibarət "Gənclik” xalq çalğı alətləri ansamblı (konsertmeyster – Nəsibullayev H.B.), "Veteranlar” beynəlmiləl xoru (dirijor – Arazova R.R. və konsertmeyster – Xıdırov F.İ), 8 nəfərdən ibarət "Günəş” studiyası və "Göyərçin” kukla teatrı (rəhbər – Ələkbərli S.), müxtəlif kurs və dərnəklər fəaliyyət göstərirdi.
Ümidvarıq ki, bu mədəniyyət evi sökülsə də, onun potensialı "havaya uçmayacaq”.